Fa’atūmauina le Ipu ‘a le Bledisloe ‘i Niu Sila mo le isi tausaga

‘Ua toe fa’atūmauina le Ipu ‘a le Bledisloe ‘i Niu Sila mo le isi tausaga ‘ina ‘ua manumālō le ‘Olopeleki ‘i le lā ta’aloga ma le ‘au ‘a ‘Ausetālia ‘i le afiafi ‘o le Aso To’ona’i ‘i le ulua’i ta’aloga ‘e lua ai ta’aloga ‘o lenei ta’amilosaga ‘i le vā ‘o ‘au ‘e lua. ‘O se ta’aloga mata’ina na manumālō ‘ai Niu Sila ‘i ‘ai ‘e 31 ‘i le 28.

‘O se ta’aloga ‘i le molimau ‘a le to’atele, ‘ana lava le taimi ‘i le ‘afa mulimuli, ma le toe tūla’i mai ‘o ‘Ausetālia ‘i le ‘afa mulimuli ‘i le fa’aaogāina ‘o le latou ‘au fa’aleoleo, se’i manū ‘e faiā’ina Niu Sila, ‘i le mānaia ‘o le taumafai mai ‘a ‘Ausetālia ‘i le tele ‘o fa’alētonu ‘i le ‘afa lona lua ‘a Niu Sila.

‘O le ‘a se’e mai nei le ta’aloga mulimuli ‘i Ueligitone, ‘o le ‘a feiloa’i ai ‘Ausetālia ma Niu Sila ‘i le malae ‘a le Sky Stadium ‘i le Aso To’ona’i 28 ‘o Sētema ‘i le 7:05pm ‘i le afiafi.

ATA: All Blacks / FB.