Fa’amuta ‘e Taranaki le ‘ūmia ‘e le Makos ‘a tasman ‘o le talitā ‘o le Ranfurly Sheild

‘I le ta’amilosaga lakapī fa’aitūmālō ‘a Niu Sila, po’o le NPC, ‘ua fa’amuta ‘e Taranaki le ‘ūmia ‘e Tasman ‘o le talitā ‘o le Ranfurly Sheild, ‘ina ‘ua manumālō ‘i le lā tā’aloga ‘i Nelson ‘i le Aso Sā.

‘O ‘ai ‘o lea tā’aloga ‘e pei ‘ona maimoa ma silasila ‘i ai ananafi, ‘e 42 Taranaki ‘i le 29 ‘a Tasman, ma ‘ua sē’ia ai ma le talitā lea ua tolu vāiaso ‘o ‘ūmia ‘e Tasman.

‘O lona uiga ‘o le ‘ā mau ai ‘i Taranaki le talitā mo aso mālōlō ‘o le taumāfanafana, se’ia aulia le tausaga fou.

‘Ae ‘o le mālō ai ‘o Taranaki ‘i lea tā’aloga ‘ua tūlaga lua ai ‘i lātou ‘i le fa’asologa ‘o ‘au ‘o le NPC, ma ‘ua fa’amaonia ai ‘o le ‘ā fetaui ‘i lātou ma le ‘au ‘a Waikato ‘i le isi quarter final ‘o le ta’amilosaga.

‘O isi tā’aloga ‘i le vāega lea ‘o le quarterfinal, ‘o le ‘ā tā’a’alo ai le Liona ‘a Uēligitone lea ‘o lo’o tūlaga muamua ‘i le taimi nei, ma le ‘au ‘a Counties Manukau, ‘o le Bay of Plenty ‘e tā’a’alo ma le Hawkes Bay, ‘a’o Tasman ‘e tā’a’alo ma le ‘au ‘a le itūmālō Canterbury.