Fa’aaogā ‘i le Six Nations fa’asalaga ‘o pepa mūmū ta’i 20 mīnute

‘O le ta’amilosaga lakapī ‘a ‘Europa ‘o le Six Nations, ‘o le ‘ā fa’aaogāina ai pepa fa’asala lanu mūmū ta’i 20 mīnute mō le taimi muamua, ‘ina ‘ua māe’a ai le fa’ata’ita’iga ‘o lea faiga ‘o le tūlāfono ‘i ta’aloga fa’avāomālō ‘iā Nōvema. ‘O le ‘ā ‘āmata fa’aaogā ‘i le ta’aloga ‘āmata ‘o le ta’amilosaga ‘i le vā ‘o Falani ma Uelese.
Sā fa’aaoga lava lea suiga ‘i le ta’amilosaga ‘a le Hemisifia ‘i Saute talu mai le 2021.
‘I lalo ‘o lea suiga, ‘o nisi ‘o sala ‘e fa’aaogā ai le pepa mūmū, ‘o le ‘ā tuli ai ‘i tua se tagata ta’alo mō le 20 mīnute, ‘ae mafai ‘ona toe sui atu ‘i ai se isi tagata ta’alo ‘o lo’o fa’aleoleo, pe ‘ā māe’a le fa’asalaga. ‘E mafai lava e laufalī ‘ona fa’asala tagata tā’a’alo ‘i pepa mūmū po’o fa’asalaga ‘e tuli ai ‘i tua ma le ta’aloga ‘ātoa, ‘i ni gāioiga po’o se ta’alo ogaoga ma mata’utia ‘e ono āfāina ai se isi tagata ta’alo.
‘O ‘Oketopa ‘i le tausaga talu ai, na faitioina ai ‘e fa’aulūuluga ‘o le lakapī ‘a Falani le fautuaga ‘e fa’ata’ita’i ai le sala 20 mīnute ‘ona ‘e fa’apea, ‘e mafai ‘ona ātili fa’aosofia ai tagata lakapī ‘e tā’a’alo leaga ma lamatia ai isi tagata lakapī.
Link to Article (RNZ) translated by Savelina Kasiano: https://www.rnz.co.nz/news/sport/539776/six-nations-to-feature-20-minute-red-cards-for-first-time
ATA: Sāmoa Capital Radio (file).