‘E lē muta ai ‘i ‘ī – saunoa ai le faiā’oga ‘o le Fetū Sāmoa, Jamie Soward

‘E le’i taitai ‘ona tini la lātou faigāmalaga ‘e pei ‘ona saunoa le faiā’oga ‘o le Fetū Sāmoa, ‘ina ‘ua ofi atu la lātou ‘au lakapī liki ‘i le ta’amilosaga ‘o le Ipu ‘o le Lalolagi ‘i le 2026, ma toe si’itia atu ‘i le tauvaga ‘o le Ipu ‘Autū ‘o le ta’amilosaga ‘a le Pasefika.  ‘Ua fa’afiafiaina le atunu’u ‘i le manuia ‘o taumafaiga ‘a le ‘au lakapī ‘a tama’ita’i Sāmoa ‘ae ‘ua saunoa le faiā’oga, Jamie Soward, ‘o le ‘ā fa’aauau pea ‘ona fa’ao’o ma pasi atu lenei suiga lelei, mō isi augātupulaga fai mai ‘o le ta’aloga lakapī.  ‘E 216 ta’aloga ‘a Soward ‘i le lakapī ‘i le NRL, ma sā ta’alo ‘i le Roosters, Penrith ma le Dragons. 

‘O le tausaga talu ai, na vāea ai ma lana gāluega ‘i le Dragons, ‘ae na fa’ate’ia ‘o ia ‘ina ‘ua vala’au atu le peresetene ‘o le Lakapī Liki ‘a Sāmoa Geoff Brown ‘e faiā’oga ‘i le Fetū Sāmoa.  Sa ia fa’ailoa lona laki ‘ona ‘o le lelei ‘o le ‘aufaigāluega ‘o lo’o lātou gālulue fa’atasi ‘i le pūlega ‘o le ‘au, ‘o lo’o lagolago mālosi ‘iā te ia, ‘e aofia ai Frank Pritchard, Pauline Poloai, Niall Williams, Shane Flanagan, Kyle Stanley ma le to’atele ‘e lē mafai ‘ona ia tōlaulau ta’ito’atasi.  ‘O le fuafuaga ‘a le faiā’oga, ‘e lē na’o le malae ta’alo, ‘ae ‘o lo’o va’ava’ai fo’i ‘i tū ma aga’ifanua.  ‘E iai a lātou semina fa’aleaganu’u ‘ona ‘o le to’atele ‘o tama’ita’i ‘e lē na’o le ta’itasi o lātou tagātānu’u, ‘ae ‘o nei a’oa’oga, ‘o lo’o mafai ‘ona feso’ota’i ai ma o lātou itū Sāmoa.  Talu ‘ona māe’a ta’aloga ia na manumālō ai, ‘ua tele vala’au ‘e lē gata mai Kuiniselani, Niu Sau Uelese fa’apea Niu Sila mā ‘o le ‘ā iai teine ‘e ta’i 16 ‘i le ta’i 17 tausaga le matutua ‘e agava’a mo le Ipu o le Lalolagi 2026.  Na fa’aalia ‘e Soward, ‘o le ‘ā asiasi ‘i Sāmoa ‘i se taimi ‘o le tausaga fou.  ‘E to’alua o lā alo ma lona faletua.

Link to RNZ (Article) translated by Savelina Kasiano: https://www.rnz.co.nz/international/pacific-news/533519/it-doesn-t-end-here-fetu-samoa-coach-jamie-soward-on-the-team-s-success

ATA: Andrew Cornaga / Photosport