‘E lē mānana’o kalapu soka ‘a Niu Sila ‘i le A-League ‘i ni fa’afītāuli ‘i malae ta’alo

‘Ua tē’ena ‘e le ‘au soka ‘a le Auckland FC ni tu’ua’iga ‘e fa’apea ‘o vevesi sā fuafuaina ‘e le ‘au tāpua’i, ‘e iai le so’otaga ‘i le tā’aloga fa’apolōfesa muamua ‘a Niu Sila ‘i le soka ‘i le ta’amilosaga ‘o le A-league.  Na tā’ua ‘e le ‘au soka ‘a le Phoenix ‘a Uēligitone ‘ua toe fa’aopoopo le leoleoga ma le puipuiga mō le tā’aloga ‘i le Aso To’ona’i ‘i le laumua, ‘ona ‘e iai ni līpoti ‘o ni taupulepulega ‘e fa’atupu ni vevesi ‘e le ‘au tāpua’i asiasi mai pei ‘ona fe’āvea’i ai tala ‘i luga ‘o ‘upega ‘o feso’ota’iga. 

Na tā’ua ‘e le ‘ōfisa sili ‘o le ‘au ‘a ‘Aukilani, Nick Becker na te le’i va’aia lava ni taufa’amata’u ‘i luga ‘o ‘upega ‘o feso’ota’iga mā ‘e le’i fa’aali atu fo’i ‘e le pule ‘a le Phoenix ni fa’amaoniga ‘iā te ia.  ‘E talitonu Becker, ‘e lēai sona manatu, ‘e maua ‘i Niu Sila ‘itū’āiga vevesi ia ‘e tutupu ‘i atunu’u ‘i fafo ‘i tā’aloga soka. 

‘E o’o atu ‘i le 500 le ‘au tapua’i ‘a ‘Aukilani lea ‘o lo’o iai le talitonuga ‘o le ‘ā malaga mai ‘i Uēligitone mō le tā’aloga ‘i le vā ‘o ‘au ‘e lua ia ‘o lo’o pito ‘i luga ‘i le ta’amilosaga.  ‘O le ta’amilosaga ‘o le A-League sā fa’asalaina ai le ‘au ‘a le Victory ‘a Melepone ‘i le 600,000 tālā ‘e le Fa’alāpotopotoga Soka ‘a ‘Ausetālia ma tō’ese ai o lātou ‘ai ‘i le tausaga talu ai, ‘ina ‘ua o’o nisi ‘o le ‘au tāpua’i ‘i luga ‘o le malae ma tau’ai ni nofoa malepe ma ātigifagu ‘i leoleo ‘i le taimi ‘o le tā’aloga ma le Melbourne City ‘iā Tēsema 2022.

Link to RNZ (article) translated by Savelina Kasiano: https://www.rnz.co.nz/news/sport/532419/new-zealand-s-a-league-clubs-don-t-want-trouble-in-the-stands

ATA: PHOTOSPORT – Auckland FC and Wellington Phoenix fans