‘E lē faia ‘i ‘Aukilani tū’ūgā va’afailā  mō le Americas Cup pe ‘ā mālō le team New Zealand ‘i Barcelona

‘Ua atagia ‘i le manatu ‘o se tasi ‘o tagata ‘autū ‘o le kamupanī ‘e ona le va’afailā Niu Sila, ‘o le Emirates Team New Zealand, ‘e lē faia ‘i ‘Aukilani le isi ta’amilosaga ‘e soso’o ai ‘o lea Ipu, pe ‘ā fai ‘e manuia ma mālō ‘i lātou ‘i tū’uga ia ‘o lo’o fa’agāsolo nei ‘i le ‘a’ai ‘o Barcelona ‘i Sēpānia.

‘O se talanoaga ‘a le tagata lenei, ‘e igoa ‘iā Matteo de Nora, ma se nusipepa ‘Ītalia, na ia tā’ua ai, ‘āfai ‘o isi tū’uga ‘e soso’o ai mō le Americas Cup ‘e faia ‘i totonu ‘o le isi lua tausaga ‘o lumana’i, ‘o lona uiga ‘ā lē toe faia ai ‘i Barcelona, ‘o le ‘ā si’i atu ‘i se atunu’u ‘i Sasa’e Tūtotonu.

‘O le ali’i Pilionea lenei, ‘o se tasi ‘ua tele tausaga ‘o ia lagolagoina le Emirates Team New Zealand, ma na fa’aalia ‘o ia lava ‘e aupito ‘i telē lona sao ‘i le fa’atupeina ‘o le va’afailā lenei ‘o Niu Sila.

Na ‘āmata mai ‘i le tausaga ‘e 2000 ‘ona a’afia le tagata lenei ‘i le Team New Zealand, mā ‘o se tasi sā tū mālosi ‘i le toe taumafaiga ‘o le ‘au ‘a Niu Sila, ‘ina ‘ua mālō le va’a ‘o le Alinghi ‘i le Ipu ‘o le Americas Cup,  ‘i le tausaga ‘e 2003.

‘O le 2011 na fa’ae’e ai ‘iā te ia le fa’ailoga taualoa ‘a le Mālō Niu Sila, ‘o le Order of Merit, mō lona sao ‘i le ātīna’e ‘o tū’ūga va’afailā fa’apea ma isi gāluega fesoasoani ‘i totonu ‘o Niu Sila.

Link to Stuff (Article) translated by Lauano Ilaoa: https://www.nzherald.co.nz/sport/sailing/americas-cup/americas-cup-team-nz-boss-reveals-where-next-series-is-likely-to-be-held/K4BZIJPJ5VGLZFALL6GDYCVACQ/

ATA: Stuff – Matteo de Nora: “The Middle East is ready in two years. Barcelona already is.” Photo / Supplied