‘Āmata su’esu’ega ‘a le Komisi ‘o Fusu’aga ‘a Fiti, ‘a’o ta’oto pea Nathan Singh ‘i le falema’i

‘Ua ‘āmataina nei ‘e le Komisi ‘o Fusu’aga ‘a Fiti (BCF), se su’esu’ega ‘i si’osi’omaga ‘uma lava ma le māfua’aga na pa’ū ai le ali’i ‘o Nathan Singh po’o Ubaya Haider ‘i fafo ‘o le maea fusu ‘i le Aso To’ona’i talu ai.  Na faia’ina Singh ‘i le ta’amilosaga lona 9 ‘i le faipelēga ma Runqi Zhou ‘o Saina ‘i le fusi ‘o le paga, le IBO Asia Pacific Featherweight ‘i lalo ‘o le polokalame ‘a le South Pacific Boxing Promotions. 

‘O lo’o iai pea le ali’i fusu ‘i le falema’i mā ‘e le’i te’i ane lava talu mai le taimi na matapogia ai.  ‘O līpoti ‘a nisi ‘o tusitala ‘i totonu lava ‘o Fiti, na tā’ua ai, ‘e fa’apea na maua ni nila po’o ni tui ma le vailā’au ‘o le epinephrine ‘i le nofoaga ‘e tāpena ai tagata faipelē ‘i le King Charles Park ‘i Nadi.  Sa tā’ua ‘e le ta’ita’ifono ‘o le Komisi ‘o Faipelēga ‘a Fiti, Adi Narayan, ‘e iai tu’utu’uga mō fusu’aga ‘uma ‘ina ‘ia su’esu’eina ai tagata faipelē mō fuālā’au ma vailā’au ‘e lē fa’atagaina pe ‘ā māe’a fusu’aga ‘uma.

Link to RNZ (article) translated by Savelina Kasiano: https://www.rnz.co.nz/international/pacific-news/532206/fijian-boxer-in-induced-coma-boxing-commission-of-fiji-launches-inquiry

ATA: Facebook / Ubaid Haidar – Ubayd Haider, aka Nathan Singh, is fighting for his life