8 Pine ‘Auro fa’amanuiaina ai le ‘Au Si’isi’i ‘a Sāmoa ‘i Fiti

‘E valu pine ‘auro, tasi le pine siliva, tasi le pine ‘apamemea, ‘e aofia ai ma matāti’a ‘e fā mō ta’aloga ‘a Mālō ‘o le Taupulega ma isi matāti’a ‘e fā mō ta’aloga ‘a le Oseānia – ‘o le oso lea ‘a le ‘au masi’i ‘a le atunu’u na toe taliu atu ai ‘i Sāmoa, i le māe’a ai ‘o le ta’amilosaga ‘i Fiti.

‘I se feiloa’iga ma le ‘aumalaga, na maua ai le avanoa tāua ‘o le Afioga ‘i le Minisitā ‘o le Matāgāluega ‘o Ta’aloga ma Alagā’oa mō le Soifua Fiafia ‘o Tagata iā Laumatiamanu Ringo Purcell fa’apea le ‘Ofisa Sili ‘o Pūlega ‘o le Matāgāluega, e momoli ai le fa’afetai fa’apitoa ‘a le Mālō ma tagatānu’u ‘uma ‘o Sāmoa ‘i le tautua matavela ‘a nei tamafanau ‘a le atunu’u.

Na saunoa le Minisitā: “Fa’afetai fa’aeaea atunu’u, mālō onosa’i, mālō finau, lea ua tau lau o lō outou fa’amoemoe, fo’i pea le vi’iga i le Atua, ona o le malosi sa foa’i atu iā te outou. O le manuia o ā outou taumafaiga, e atagia ai pulega lelei ma le galulue fa’atasi o itutino uma o ‘au si’isi’i a Samoa ina ia tini la outou moemitiga.

“O le naunauta’iga lea o le tatou Mālō, ina ia fa’aauau ai pea matāti’a maoa’e e fa’atūina e alo ma tatou tamafanau, ma maua ai lava lo outou avanoa e avea ai ma ‘ave fu’a a Samoa i nei ta’aloga fa’avāomālō.

“Momoli atu le fa’amālō i le Ta’ita’i Malaga, Faiā’oga aemaise o le Pulega, mo lā outou galuega fītā o lo’o fa’atino, auā se alualu i luma o ‘au masi’i a le atunu’u.”

ATA: Taunuuga Toatasi / (Government of Sāmoa).