$3.8miliona tālā mō le ‘au kilikiti ‘a tama’ita’i ‘o le White Ferns ‘a Niu Sila

‘E $3.8miliona tālā, le fa’ailoga tupe ‘o le ‘ā vaevaeina tutusa ‘i le to’a sefulu lima ‘o tama’ita’i ‘o le ‘au kilikiti ‘a le White Ferns ‘a Niu Sila, lea na mālō ‘i le Ipu ‘a le lalolagi  ‘i Dubai, ‘o lona uiga ‘e $205,000 ‘a le tagata.‘O le aofa’iga ‘ātoa ‘o le tupe na maua ‘e le ‘au lenei ‘ina ‘ua mālō ‘i le Ipu ‘i le lā su’egāfusi ma le ‘au ‘a ‘Aferika ‘i Saute, ‘e $12.85miliona tālā, ‘ua sili atu ‘i le fa’aluaina fa’ailogatupe sā iai mō isi Ipu ‘a le Lalolagi ‘i ta’aloga nei T20 ‘a le ītūpā ‘o tama’ita’i.

Na fa’ailoa mai ‘e le pūlega ‘o kilikiti ‘a le lalolagi, ‘o le si’itia ‘o vaegātupe mō ta’aloga ‘a tama’ita’i, ‘o se taumafaiga ‘ina ‘ia fa’atutusa ai ma le vāega o ali’i.‘O le ‘au kilikiti ‘a tama’ita’i ‘o Niu Sila, ‘o lona tolu ai lea ‘o atunu’u ‘ua manumālō ‘i le Ipu ‘o le lalolagi ‘i ta’aloga ta’itasi aso po’o le ODI ma le vāega ‘e ta’i 20 ova, le T20.‘O isi atunu’u ‘e lua ‘o Egelani ma ‘Ausetālia. ‘O le taimi nei, ‘o lea ‘ua aga’i atu ‘i ‘Initia le White Ferns ‘a Niu Sila mō ta’aloga ta’itasi aso po’o le ODI series fa’asaga ‘i le ‘au ‘a ‘Initia, lea ‘e ‘āmata ‘i le Aso Tofi.

Link to RNZ (article) translated by Lauano Ilaoa: https://www.rnz.co.nz/news/sport/531420/big-payday-for-white-ferns-with-t20-world-cup-win

ATA: Every player in the White Ferns T20 squad receives NZ$205,000 after their win.  Isuru Sameera Peiris/Photosport