‘Ulua’i pine ‘a Sāmoa ‘i le ta’amilosaga ‘o ta’aloga ‘a Mālō ‘o le Taupulega – John Tafi

Mai ta’aloga, ‘i le ‘au masi’i ‘a Sāmoa mai le ta’amilosaga ‘a Mālō ‘o le Taupulega ‘o lo’o fa’agāsolo nei ‘i Glasgow, ‘o le sui ‘a Sāmoa ‘i le ta’aloga si’isi’i u’amea mamafa ‘iā John Tafi, ‘ua ‘ūmia nei le ulua’i pine ‘a le ‘au ‘a Sāmoa, ‘ina ‘ua fa’amanuiaina ana taumafaiga ‘i le pine siliva. ‘Ua ia fa’atūina nei se matāti’a ‘i lana ‘aupaga ‘i le si’i mālōlō ‘e 172 kilokalama, ‘ae 142 kilokalama ‘i le si’i ma lele.

‘E ui ‘e le’i manuia le taumafaiga ‘a le tama’ita’i ‘iā ‘Ānoni Faumui, ma ‘o lana tauvaga fa’avā ‘o mālō muamua lenei talu ‘ona iai ‘i totonu ‘o le ‘asosi si’isi’i u’amea mamafa ‘a le atunu’u, ‘ae na mata’ina lana taumafaiga ma fa’atūlaga mai ai ‘i le tūlaga 8, ‘e fua atu ‘i atunu’u tetele na o lātou tauvā.

‘Ae mai le vāega ‘o faipelega, ‘o lo’o fesoasoani ai le alo ‘o Sāmoa ‘iā Faumuinā To’aletai David Tua, ‘ua sao atu ai ‘i le quarter final le ali’i ‘iā Marion Ah Tong, le ‘aupaga ‘o le 70 kilokalama.

‘A’o fa’agāsolo ai ta’aloga ‘i Glasgow, ‘o Sāmoa lea ‘ua ‘i le tūlaga 15 ‘o atunu’u ‘ua maua a lātou pine.

IMAGE/ATA: Sāmoa Weightlifting Federation Inc. Facebook