Taui mō le goto ‘o le va’a ‘o le Manawanui ‘i Sāmoa

‘E fōliga mai ‘ua maua se māliega ‘i le vā ‘o le Mālō Niu Sila ma le Mālō Sāmoa, ‘e tusa ‘o se taui mō a’afiaga ‘e māfua ‘i le goto ai ‘o le va’a su’esu’e ‘o le Manawanui ‘i Sāmoa ‘i le tausaga ‘ua mavae.

Na fa’ailoa mai ‘i se līpoti ‘a le Uaeālesi Fa’asalalau ‘a Niu Sila, ‘o se taimi ‘e le’o mamao, ‘o le ‘ā tu’uina mai ai se fa’asalalauga āloa’ia, ‘e tusa ai ‘o lenei tūlaga.

‘E pei ‘ona silafia, ‘o le asō le Aso Gafua lenei 6 ‘o ‘Oketopa, ‘ua ‘ātoa lelei ‘i ai le tausaga talu ‘ona tupu le fa’alavelave ‘i le va’a lenei ‘o le Manawanui ‘a le Fuāva’a ‘a Niu Sila, ma goto ai ‘i se ā’au ‘i le talafātai ‘i saute ‘o le motu ‘o ‘Upolu.

Na ‘āmata mai ai ‘i lenā taimi ‘ona talosaga mō se taui le pule mamalu ‘a matai ‘o nu’u na āfāina  o lātou gātaifale ‘ina ‘ua tāofia le fāgotaina ‘o le sami ma āfāina ai a lātou tupe maua ‘ātoa ma le fofoga taumafa māsani ‘o tagata.

Na fa’aalia ‘i le līpoti mai le Uaeālasi Fa’asalalau ‘a Niu Sila, ‘e iai le talitonuga, ‘o lea ‘ua maua le maliega ‘i le vā ‘o mālō ‘e lua ‘e tusa ai ‘o se taui mō ia tūlaga, ma ‘ua ta’atia atu ‘i le Mālō ‘o Sāmoa lātou te fa’alauiloaina mai fa’alaua’itele le au’ili’iliga.

Sā fa’aalia mai ‘e le Minisitā ‘o le Puipuiga ‘a Niu Sila, ‘o Judith Collins, ‘o le Matāgāluega ‘o le Vā ‘i Fafo po’o le MFAT, ‘e tatau ‘ona fa’afeso’ota’i mō se fa’amatalaga ‘e tusa ‘o lenei matā’upu.

‘O le taunu’uga ‘o se su’esu’ega sā faia ‘e tusa ‘o lenei fa’alavelave ma fa’asalalauina mai ‘i le māsina ‘o ‘Aperila, na tā’ua ai, le lē agava’a ‘o le ‘auva’a ‘o le va’a su’esu’e lenei ‘o le MANAWANUI ‘i matāfaioi sa o lātou feagai, mā ‘e o’o lava fo’i ‘i le va’a, ‘e le’i ‘āto’atoa mō le fa’atinoina ‘o su’esu’ega sā a’afia ai, ‘i le taimi na goto ai ‘i Sāmoa.

ATA: Profile Boats / supplied (RNZ).