Pā le pa’u ‘o le loli le ‘āmataga ‘o le fa’alavelave, māliliu ai le to’atolu

‘I se feiloa’iga ma tusitala ‘i le aoauli ananafi, na fa’amanino ai ‘e leoleo, na pā se pa’u ‘o le loli, na māfua ai le fa’alavelave, na fetaui ai ma le van na malaga atu ai tagata ‘e to’aono, fa’atasi ai ma nisi ta’avale se lua, lea na maumau ai soifua ‘o le to’atolu. 

Na fa’aalia ‘e Tony Wakelin ‘o le ‘Ōfisa ‘o Leoleo, ‘o le to’atolu lea na māliliu ‘i le fa’alavelae ‘i le State Highway 1 ‘i ‘Aukilani ‘i le Aso Gafua, ‘o le tamā ‘iā Fa’aofo Uili Fa’aofo (45), Leauga Jerry Leauga (32) ma le susuga ‘iā Ta’avao Kelemete (37) mai Sili ‘i Savai’i.  ‘O isi tagata ‘e to’atolu na malaga ‘i le van na ‘ave ‘i le falema’i, ma ‘e 21 tausaga ‘o se taule’ale’a ‘o lo’o tīgāina ma isi taulele’a ‘e to’alua, ‘e 42 ma le 39 tausaga le mātutua, sa a’afia ‘i ni manu’aga ‘e lē ogaoga tele. 

Na fa’aalia fo’i ‘e Wakelin, ‘o lo’o fa’aauau pea su’esu’ega ‘ina ‘ia fa’amaonia po’o ai ‘i lātou na a’afia peita’i ‘o ē na malaga ‘i le van, ‘o tagata Sāmoa ‘e galulue ‘i gāluega fa’avāitaimi ‘i fa’ato’aga ma sā iai le fuafuaga ‘e toe fo’i ai ‘i Sāmoa ‘i le vāiaso nei.  ‘E le’i tele ni manu’aga ‘o le ‘ave loli ma ‘ua te’a ‘i tua ma le falema’i.  ‘O se fa’alavelave mata’utia tele, mā ‘o lo’o fa’aauau pea ‘ona tu’uina atu le fesoasoani ma le lagolago mō ‘i lātou ‘uma lava ‘ua a’afia ‘e aofia ai fo’i la lātou ‘aufaigāluega na o’o atu mō gāluega fesoasoani, pei ‘ona tā’ua ‘e Wakelin, ‘o se leoleo su’esu’e.  Na ia fa’afetaia tagata na taunu’u atu ma fesoasoani, peita’i, na matuā faitioina ‘e Wakelin tagata na pu’eina ata ‘o le fa’alavelave.  Mā ‘i lona manatu, ‘e matuā ‘inosia lea gāioiga. 

Ma ‘o lana fesili ‘i tagata na faia lea amioga, po’o ā ni o lātou lagona pe ‘ana ‘o o lātou ‘āiga ia? ‘Ua vala’au leoleo ‘i so’o se tagata ‘o iai ni fa’amatalaga po’o ni ata fo’i na mafai ‘ona iloa ai le taimi na tupu ai le fa’alavelave, ‘e fesoasoani mō a lātou su’esu’ega.

ATA: NZ Herald (Supplied). VIDEO: RNZ.