‘O se tala fa’anoanoa: Na tāpena ‘e toe fo’i ‘i Sāmoa, ‘ae māliliu le to’atolu ‘i se fa’alavelave tauta’avale ‘ananafi 

‘O se tala fa’anoanoa na tula’i mai ‘i le Aso Gafua ‘i ‘Aukilani, ‘i le māliliu ai ‘o ni alo Sāmoa ‘e to’atolu ‘i se fa’alavelave tauta’avale ‘i le State Highway 1 ‘i ‘Aukilani ‘i le pitonu’u ‘o Ramarama.

‘O nei alo Sāmoa ‘e to’atolu ‘ua maua fa’amatalaga, na tāpena ‘e toe tāliu ‘i Sāmoa le faigamalaga, ‘i le māe’a ai ‘o le taimi sa gālulue ai ‘i galuega fa’avaitaimi ‘i Niu Sila nei. ‘Ae pagā lea, ‘ua le tau lau ‘o lea fa’amoemoe.

Na tūla’i mai lenei fa’alavelave ‘i le 2pm ‘i le aoauli, a’o malaga mai ai nei alo Sāmoa mai le Bay of Plenty ‘e agai atu ‘i ‘Aukilani, ‘e tāpena ai le toe malaga atu ai ‘i Sāmoa.

‘Ia fa’amaise atu le agaga ‘o le Atua ‘i ‘āiga fa’anoanoa ma le fa’avauvau, ‘ona ‘o le tō’esea ai ‘o nei alo Sāmoa ‘i le mafutaga, ‘ona ‘o le malaga ‘a le māliu ma le oti. Rest in Love to these Sāmoan victims.

ATA: NZ Herald (Supplied).