‘E le’i talosaga atu le Palemia ‘o Niu Sila, po’o le Komesina Mauāluga ‘a Niu Sila ‘i Sāmoa, mō se suafa matai ‘o Christopher Luxon

‘I se pepa ‘o fa’amatalaga mai le Mālō Sāmoa ‘i le taeao nei, ‘ua toe fa’ailoa manino mai ai ‘e le Afioga ‘i le Ali’i Palemia, le Susuga ‘i le La’aulialemalietoa

 ‘e le’i fa’atalosagaina ‘e le Palemia ‘a Niu Sila, po’o sona sui, se fa’afotutupu ‘i se suafa matai ‘i lana malaga atu ai ‘i Sāmoa.

‘O le toe fa’amanino mai ai ‘o lenei matā’upu, ‘e āfua mai ‘i le tele ‘o fa’amatalaga na fe’avea’i ‘i le fa’ai’uga ‘o le vaiaso, ‘e lē gata ‘i Sāmoa, a’o alaleo ma alatelevise ‘i Niu Sila nei,  ‘ona ‘o se fa’atalanoaga ‘a le Afioga ‘i le Palemia ‘i le polokalame Fofola le Fala ‘i le Aso Faraile, na saunoa ai le Palemia:

“Auā na oo mai lava le High Komesina o le Ofisa o Niu Sila, e fia fai se suafa o le Afioga i le Alii Palemia.. O’u fai atu lea iai, o lea le mafuaaga ua finagalo ai le Alii Palemia, e fai lona suafa?” – “Ua talosaga mai lava ia..”

Na fa’ailoa ‘e le Afioga ‘i le Palemia, ‘o le fa’afotutupu ‘i se suafa matai, ‘o se fa’aaloalo ‘a le Mālō ‘e māsani ‘ona fa’atinoina ‘i le malaga atu ai ‘o ni ta’ita’i, mā sa fa’amanino, ‘o le fuafuaga lava lea ‘a le Mālō Sāmoa na iai, ‘e fa’atino mō le Palemia ‘o Luxon.

‘O le taeao nei ‘o lo’o fa’atino ai le tūla’i fa’aaloalo ‘a le Mālō ‘e tauala ‘i le faigāmalaga ‘a le Afioga ‘i le Palemia ‘o Niu Sila, le Rt Hon. Christopher Luxon.

ATA: Government of Samoa / Facebook.