Tatau ‘ona mālosi le tete’e atu ‘i le vevela ‘o le ‘ea

by | Nov 16, 2026 | Lalolagi, Pacific

‘Ua fa’aalia ‘e le Peresetene ‘o le Atu Maresala, ‘e tatau ‘ona mālosi le tete’e atu ‘a le lalolagi ‘i le ono si’itia ‘o le fua ‘o le vevela ‘o le ‘ea ma le si’osi’omaga ‘i tua atu ‘o le tapula’a na pasia ‘i le Feagaiga ‘i le ‘a’ai ‘o Pale. ‘Auā ‘o le mea mautinoa, ‘o le i’uga lea ‘o le lalolagi pe ‘āfai ‘o le mea lea ‘o le ‘ā tupu.

‘O se lipoti lata mai nei ‘a Mālō ‘Aufa’atasi, ‘ua manino ai le ono sili atu ‘i le 1.5 tikeri Celsius le si’itaga ‘o le fua ‘o le vevela ‘o le lalolagi. ‘Ua matuā mana’omia ai le fa’aitiitia ‘o kasa ‘o’ona ‘e maua mai falegaosimea, ‘ina ‘ia fesoasoani ‘i le fa’aitiitia ‘o lea tūlaga fa’aletonu.

‘O lo’o fa’agasolo nei ‘i le ‘a’ai ‘o Antalya ‘i le atunu’u ‘o Turkey, le fonotaga tele ‘a Mālō ‘Aufa’atasi ‘e fa’atatau ‘i suiga ‘o le tau, lea ‘e fa’aigoaina ‘o le COP31, ma ‘o lo’o ‘auai ai sui mai atunu’u ‘o le Pasefika.

Na fa’aalia ‘i le lipoti lata mai nei ‘a Mālō ‘Aufa’atasi, ‘o lo’o tuai tele ‘ona fa’aitiitia kasa ‘o’ona ‘o lo’o fa’amatu’u atu ‘i le ea ma le si’osi’omaga mai falegaosimea ‘o le lalolagi. ‘O le māfua’aga lea ‘o le ‘ā vave ai ‘ona sili atu ‘i le 1.5 tikeri Celsius le si’itaga ‘o le fua ‘o le vevela ‘o le lalolagi ‘i nai tausaga ‘o lumana’i nei.

‘I lana saunoaga ‘i lea fono ‘i Turkey, na ta’ua ai ‘e le Peresetene ‘o le Atu Maresala, Dr Hilda Heine, ‘o se tūlaga faigatā tele ‘ua feagai nei ma atumotu ‘o le Pasefika ‘ona ‘o suiga ‘o le tau. ‘E lē gata ‘ina lofia ai ‘i le sami laufanua ma lau’ele’ele ‘o motu lāiti, ‘ae ‘ua a’afia ai fo’i le ola lelei ‘o lā’au ma meata’itō, ‘aemaise ‘o i’a ma figota ‘o le gataifale.

‘E lē gata ‘i le Atu Maresala, ‘ae ‘o fa’afitauli fo’i ia ‘o lo’o molimauina ‘i isi atumotu, pei ‘o Palau, Kiribati, Tuvalu ma Tokelau. ‘O lo’o una’ia ai ‘e ‘aumalaga ‘a le Pasefika atunu’u tetele ‘o le lalolagi, ‘ina ‘ia matuā fa’aitiitia atina’e ‘o lo’o fa’aleagaina ai le ea ma le si’osi’omaga ‘o le lalolagi.

Link to RNZ Pacific (Article): https://www.rnz.co.nz/news/pacific/2591454/cop31-hears-1-point-5-degreesc-overshoot-not-an-option-for-pacific

IMAGE/ATA: Chewy Lin/Office of the President, Republic of the Marshall Islands (RNZ).