Tali Destanee Aiava ‘i ‘upu taufa’aleaga ‘iā te ia ‘i ‘upegatafā’ilagi

‘Ua tali le tama’ita’i tēnisi talavou Sāmoa ma ‘Ausetālia ‘o Destanee Aiava, ‘i ‘upu taufa’aleaga ‘o lo’o sauāina ai ‘o ia ‘i luga ‘o ‘upega ‘o feso’ota’iga, ‘ina ‘ua faiā’ina ‘i le ta’aloga ‘āmata ‘o le ta’amilosaga tēnisi ‘a ‘Ausetālia ‘o le 2026.  Na faia’ina Destanee ‘i le tama’ita’i ‘Egelani ‘o Harriet Dart ‘i seti ‘e lua ‘i le tasi, ma na lipotia na iloa lelei lona lē fiafia ‘i le taimi na ia tu’ua ai le malae ‘ina ‘ua ‘uma le ta’aloga. 

Mulimuli ane, na ia tu’uina ‘i luga ‘o ‘upega ‘o feso’ota’iga, ni ata ‘o lana itūlau ‘o le Instagram ‘o lo’o ta’u atu ai lona lagona ‘i le i’uga ‘o le ta’aloga.  Na lalafo atu ai ‘e nisi tagata ni tusitusiga lē talafeagai ma ‘upu ‘e fa’asagasaga ‘iā te ia.  Na ia toe fa’ailoa ai se tala ‘a se tasi tagata ma ia tusi ai ‘e fa’apea, ‘o se fa’ata’ita’iga tonu a lea, ‘o le mea ‘e tupu, ‘i tagata pe ‘ā lē fa’atonu lelei a lātou fānau. ‘E aliali ai itū leaga.  Na māfua lea, ‘ona ‘o ‘upu taufaifai ‘a nisi, na lalau ai le tama’ita’i tēnisi ‘e fa’apea, ‘e lē mafai ‘ona ta’alo tēnisi ‘ona ‘e lāpo’a.  ‘E to’atele tagata tā’a’alo ‘ua fa’aleo lo lātou lagolagoina ‘o lenei teine talavou tēnisi ‘ona ‘o ‘upu ‘o lo’o sauāina ai ‘o ia ‘i luga ‘o ‘upegatafā’ilagi.

Link to RNZ Pacific (Article) translated: https://www.rnz.co.nz/international/pacific-news/584569/samoan-australian-tennis-star-destanee-aiava-hits-back-at-disgusting-online-abuse

ATA: Supplied: Tennis Australia (RNZ).