Mana’o le Pālemia ‘o le Atu Kuki ‘e talanoa ‘i le Mālō Niu Sila
‘Ua fa’ailoa mai le fa’anaunauga ‘o le Pālemia ‘o le Atu Kuki, ‘o Mark Brown, ‘ina ‘ia maua se avanoa ‘e feiloa’i ma talanoa ai ma le Mālō Niu Sila, ‘e fofō le fa’alētonu ‘ua tūla’i mai ‘i le vāfeāloa’i ‘o mālō ‘e lua.
‘O le Aso Gafua ‘ananafi lea na toe fo’i ane ai ‘i Avarua ‘i le motu ‘autū ‘o Rarotonga, le ali’i ‘o Brown, ‘ina ‘ua ‘uma lana asiāsiga ‘e tasi le vaiaso ‘i le atunu’u ‘o Saina lea na ia sainia ai se feagaiga fa’a-pā’aga ma le Mālō ‘o Saina ‘i le ‘a’ai ‘o Beijing.
‘A’o le’i sainia lea feagaiga, sā fa’aalia ‘e Brown, ‘e lēai se mea ‘e mana’omia ai fua le ‘auai ‘o Niu Sila ‘i le sainia ‘o lea feagaiga ‘ina ‘ua fesiligia lea tūlaga, ‘e le Minisita ‘o le Vā ‘i Fafo ‘a Niu Sila ‘iā Vaovasamānaia Winston Peters.
Sā fesiligia ‘o ia ‘e le ‘au tusitala ‘ina ‘ua fo’i mai Saina, ma sā ia fa’aalia ai, ‘e le’i maua se avanoa ‘e talanoa ai ‘o ia ‘i le Mālō Niu Sila, lea ‘o lo’o iai lona fa’anaunauga ‘ina ‘ia maua se avanoa ‘i nai vaiaso ‘o lumana’i nei.
Na ia tā’ua ai ‘o se taimi ‘e lē ‘o mamao, ‘o le ‘a ia fa’alaua’iteleina mai ai le au’ili’iliga ‘o le māliega pei ‘ona ia sainia ‘i le vā ma le mālō tele ‘o Saina.
‘I le taimi nei, ‘o lea ‘ua fa’ailoa mai foi fuafuaga ‘a le Itū Āgai ‘o le Palemene ‘o le Atu Kuki, ‘e fa’atūina se lafo ‘o le lē fa’atuatuaina ‘o le ali’i Pālemia ‘o Mark Brown ma lana faigāmālō ‘ona ‘o le matā’upu ‘e uiga ‘i le feagaiga lenei ma Saina, mā ‘o le asō ‘o lo’o fuafuaina ai ni solo tete’e ‘i Rarotonga ‘e fa’asaga ‘i le Pālemia ‘o Brown ma lana faigāmālō.
Sā fa’ailoa mai fo’i ‘e se sui ‘o le ‘Ōfisa ‘o le Minisita ‘o le Vā ‘i Fafo ‘a Niu Sila, ‘i Ueligitone, ‘e mana’omia le ali’i ‘o Mark Brown ‘e fa’ailoa mai ‘i le Mālō Niu Sila aiāiga ‘o le feagaiga na ia sainia, ‘i lalo ‘o le Māliega So’ofaatasi na faia ‘i le tausaga ‘e 2001 ‘i le vā ‘o Niu Sila ma le Atu Kuki, lea ‘e fa’aigoaina ‘o le Joint Centenary Declaration.
Link to RNZ (Article) translated: https://www.rnz.co.nz/news/pacific/542137/no-areas-of-concern-cook-islands-pm-returns-home-addresses-nz-s-china-deal-fears
ATA: Sāmoa Capital Radio (file).