Vanuatu: Toe liliu mai le Hercules ‘a le Puipuiga ‘a Niu Sila ‘ona ‘o se lapata’iga ‘o se mū ‘i le afi

‘Ua toe fa’atuai le taunu’u atu ‘o le fesoasoani mai le vāega lavea’i ‘a Niu Sila mō tagata ‘o Vanuatu ‘ona ‘o le mafui’e, talu ai na toe fo’i mai le Hercules ‘a le Militeli ma le Puipuiga ‘a Niu Sila ‘e māfua ‘ona ‘o se lapata’iga ‘o se afi.  Na iai le fuafuaga ‘e tūlau’ele’ele ai le vāega fesoasoani ‘a Niu Sila ‘e aofia ai le ‘au tineimū ma fōma’i fa’apea ‘inisinia, ‘i le 8.30 ‘i le pō anapō ‘i Port Vila ma le 10 tone ‘o ni meafaigāluega.

Peita’i, na tā’ua ‘e le Puipuiga, na toe liliu fa’amālosi le va’a ‘i Noumea ‘i Niu Kaletonia ‘ona ‘o lea fa’afītāuli.  ‘O le taeao nei lea ‘e toe malaga ai se isi va’alele, ‘e ‘ave le uta ma le pāsese ma toe fa’aauau ‘i Vanuatu.  ‘O le taeao nei fo’i lea na malaga ai nisi va’alele ‘e aofia ai ma se va’a fou ‘a le militeli, ‘o le ‘ā ‘ave ai le ‘aufaigāluega ‘a le vā ‘i fafo fa’atasi ai ma se Boeing 757, ‘e ‘ave’esea ai tūrisi ‘o lo’o poloka ai ‘i Port Vila, ‘i le aoauli nei.

Na tā’ua ‘e Brendan Nally ‘o le Fenz, ‘o lo’o iai ‘uma lava mea faigāluega ma mea mo’omia ‘e le vāega lavea’i mō ‘i lātou mō aso pe ā ma le 14 ‘e aofia ai ma meafaigāluega ‘e sa’ili ai tagata ia ‘o lo’o poloka pe taomia ‘i lalo ‘o sōloga ‘o fale.  ‘O le itū ‘o ‘ave ‘i ai le fa’amuamua, ‘o le fa’asao lea ‘o le tele ‘o soifua mā ‘o le ‘ā fa’aaogāina masini felelei fa’atonutonu (drones) mō sā’iliga.  ‘E telē lava le silafia ‘o ‘i lātou ia ‘ua filifilia mō le gāluega lavea’i ‘e lē gata ‘i Niu Sila ‘ae fa’apea fo’i ma atunu’u ‘i fafo, ‘e aofia ai ma sui na fesoasoani ‘i gāluega toe fa’aleleia mai le mafui’e ‘i Kalaiesetete, pei ‘ona saunoa le sui ‘o le Fenz.

‘E 7.3 le mālosi ‘o le mafui’e lea na lūlūina ai Port Vila ‘i le Aso Lua mā ‘o lo’o iai popōlega ‘i le iai ‘o nisi ‘o taomia pea ‘i lalo ‘o sōloga ‘o fale.  Na si’itia le nūmera ‘o tagata māliliu ‘i le to’a 14 ‘i le taeao ‘o le Aso Lulu ‘ae pē to’a 200 na togafitia ‘ona ‘o manu’aga.  ‘E to’alua ni tagātā nu’u Saina ‘e fa’apea ‘o lo’o aofia ‘i le au māliliu pei ‘ona tā’ua ‘e le ‘amepasa Saina ‘i le Reuters.

Link to RNZ (Article) translated by Savelina Kasiano: https://www.rnz.co.nz/news/national/537074/vanuatu-quake-nzdf-hercules-diverted-after-engine-fire-warning

ATA: NZ Defence Force / Sergeant Maria Eves