Valo’ia le o’o atu ‘i le 10,000 tagata ‘o le hikoi ‘e tete’e ‘i le Pili, Treaty Principles Bill

‘Ua fautuaina tagata ‘o le atunu’u ‘e feoa’i ‘i pasi ma nofoaafi po’o ta’avale afi mō le aso ā taeao, ‘ina ‘ia nofo silafia, ‘i le pisi ma le tuai ‘o feoa’iga ‘ona o le solo tete’e ‘e fa’asaga ‘i le Pili ‘o le Treaty Principles Bill, lea na folasia ‘e le ta’ita’i ‘o le ACT David Seymour. ‘O ananafi lea na taunu’u ai ma potopoto le hikoi ‘i Porirua, na ‘āmata mai lava i Cape Reinga ‘i le pito ‘i luga ‘o le Motu ‘i Mātū ‘i le aso 11 Nōvema ‘e āga’i atu ‘i le Palemene. 

Na fa’asolosolo ‘ona ‘āuai le faitau afe ‘o tagata ‘i le solo, sa sāvavali, ō isi na ti’eti’e ‘i ta’avale ‘a’o isi na ti’eti’e ‘i solofanua.  Na o’o mai ‘i Palmerston North ma fa’aauau mai ai ‘i Levin se’ia taunu’u mai ‘i Porirua ‘i le afiafi ananafi. ‘O le fa’anaunauga ‘ina ‘ia taunu’u ‘i le Palemene ‘i le Aso Lua.   ‘O le ‘ā iai pasi ma nofoāafi fa’aopoopo ‘e tau fa’aitiitia ai le pisi ma le tumu ‘a’o āga’i atu le hikoi ‘i le Palemene ‘i le taulaga ‘i Uēligitone ‘i le aso ā taeao.  Peita’i, ‘ua fautuaina pea tagata ‘ina ‘ia fa’aopoopo taimi ‘o faigāmalaga, ‘ona ‘ua iai le talitonuga, ‘o se tasi lea ‘o solo tete’e pito sili ‘ona to’atele ‘i totonu ‘o le laumua pe ‘ā fua ‘i nai tausaga ‘ua tuana’i atu, ‘e tusa ai ma se fa’amatalaga ‘a le Pūlēgānu’u ‘a Uēligitone.  

Na fa’aalia ‘e Richard Maclean ‘o le pūlēgānu’u, ‘ā fai ‘o iai se fuafuaga ‘e malaga ‘i le taulaga ‘i le taeao ‘o le Aso Lua, vave ‘ona usu pe fa’aopoopo le tasi po’o le lua itūlā ‘i le taimi ‘o lau faigāmalaga, pe ‘ā fuafua ‘e āga’i ‘i le malae va’alele mai le Hutt Valley po’o Kapiti Coast po’o Porirua.  ‘O nofoaga fa’atali nofoāafi ‘i Porirua, Petone ma Waikanae, ‘o lo’o iai le talitonuga, ‘o nofoaga ‘autū ia ‘e fa’aaogā mō feoa’iga ‘a le hikoi. 

‘O le ‘ā uia ‘e le hikoi le Golden Mile ‘i Courtenay Place, Manners Mall, Willis fa’apea ma Lambton Quay.  ‘O le ‘ā malaga le isi vāega ‘o le solo ‘i ta’avale mai Porirua pe tusa ‘o le 6 i le taeao ma āga’i atu ‘i saute ‘i le ‘auala ‘o le SH59, fa’asolo atu ‘i le SH1 ma āga’i atu ai ‘i le taulaga ‘i Uēligitone.  ‘O le isi kulupu ‘e tu’ua Petone ‘i le 4 i le vaveao ‘o le Aso Lua, ‘e sāvavali ‘e lē ō ‘i ni ta’avale ma ui atu ‘i le Esplanade, SH2 ‘i Ngauranga, Hutt Road ma fa’asolo atu ‘i Thorndon Quay.  ‘A māe’a le solo tete’e ‘i le Aso Lua, ‘ona toe fo’i lea ‘i Waitangi Park ‘i le aoauli.

 ‘O le asō lea ‘o lo’o fai ai se mālōlōga ‘a le solo.  ‘Ua iai le talitonuga ‘o le ‘ā o’o atu ‘i le sefuluafe le nūmera ‘o tagata ‘e ‘āuai ‘i le hikoi. 

Sa fa’ailoa ‘e le Palemia Christopher Luxon, ‘o lo’o ia tatala atu le avanoa ‘e talanoa atu ai sui ‘o le solo tete’e pe ‘ā taunu’u ‘i le Palemene.  Sa iai Luxon ‘i le fono ‘a le APEC ‘i Peru, ma e taunu’u mai ‘i le asō.

Link to RNZ (Article) translated by Savelina Kasiano: https://www.rnz.co.nz/news/te-manu-korihi/534051/hikoi-mo-te-tiriti-wellington-commuters-warned-to-expect-hours-long-delays-when-protest-march-arrives-at-parliament

ATA: Supplied/Angela Ryan (Porirua Hikoi).