Vala’au le Komisi mō Pisinisi ‘i le Kiwibank ‘ina ‘ia si’itia ma fa’aleleia ana ‘au’aunaga – ripoti

‘E tatau ‘i le Kiwibank ‘ona fa’amalosi atili ma ‘āmata le faiga ‘ua ta’ua ‘o le open banking ‘ina ‘ia telē le avanoa ‘e aofia ai ‘i fa’atauvaga ma isi faletupe ‘e pei ‘ona vala’au ai le Commerce Commission, po’o le Komisi ‘e fa’amālosia le tūlāfono ‘e fa’atatau ‘i fefa’ataua’iga talafeagai, ma va’ava’ai po’o talafeagai faiga fa’atauvaga ma tupe nonō ‘e tagata. 

‘I se lipoti fa’ai’u ‘a le Komisi ‘i matā’upu ‘o teugā tupe ‘a tagata ta’ito’atasi, ‘o lo’o tā’ua ai, le laitiiti ‘o faiga fa’atauvaga ‘i ‘au’aunaga ‘a faletupe, ma ‘o lo’o pito tele lava polōfiti ‘a faletupe tetele ‘a ‘Ausetālia, ‘a’o ātili faigatā ai ‘i faletupe lāiti ma isi faletupe fou ‘ona lu’itauina ‘ona ‘o aiāiga ‘a le Faletupe Fa’aleoleo.  Na fa’aalia ‘e le ta’ita’ifono ‘o le Komisi, John Small, ‘a lelei ‘ona fa’atautaia ma fa’agaioi le maketi ‘o ‘au’aunaga tau tupe, ‘o le ‘ā malosi fo’i faiga fa’atauvaga ‘e talafeagai mō tagata fa’atau po’o tagata ‘e fa’aaogāina ia ‘au’aunaga.  Na fa’aalia fo’i ‘e Small, ‘o lo’o tulituliloa ‘e faletupe tetele le puipuiga ‘o polōfiti.  Ma ‘e tuai tele le gaioi ‘a faletupe ‘i le ‘āmataga ‘o le open banking ma ‘e mo’omia le gālulue fa’atasi ‘o le mālō ma faletupe ‘e fa’atino lea faiga.  Sa talisapaia lelei ‘e le Mālō lea fautuaga ‘a le Komisi.  Na saunoa le Minisitā ‘o Tupe Nicola Willis ‘o le ‘ā tali le mālō ‘i fautuaga ‘uma ‘e 14 pei ‘ona ‘aumai ‘i le līpoti ‘a le Komisi. 

 ‘O le fa’anaunauga ‘o le komisi, ‘e mafai ai ‘e tagata ‘ona faigofie le fesuia’iga ‘o faletupe ‘e na te fa’aaogāina mo ana teugātupe, pe ofo atu fo’i ‘i ai ni ‘au’aunaga ‘o lo’o faia fa’atauvaga ‘e filifili ai. 

Link to RNZ (Article) translated by Savelina Kasiano: https://www.rnz.co.nz/news/business/525633/commerce-commission-calls-for-beefed-up-kiwibank-and-open-banking-in-final-report

ATA: RNZ.