Vala’au le IRD ‘i ‘au’aunaga ao ‘aitālafu (debt collectors) ina ‘ia ao mai ‘aitālafu ‘a tamaiti ā’oga ‘o lo’o ‘i fafo.

‘Ua fa’aluaina ‘e le Matāgāluega ‘o Lāfoga ‘a lātou ‘au’aunaga ‘o lo’o nafa ma le tulituliloaina ‘o ‘aitālafu po’o nonōgātupe ‘a tamaiti ā’oga ‘o lo’o i fafo atu ‘o Niu Sila, ma o lo’o faia fo’i nisi ‘o tagi fa’aletūlāfono ‘i Niu Sila ma ‘Ausetālia. ‘Ua silia ma le  $2.37 piliona tālā ‘aitālafu ‘a tamaiti ā’oga, ‘o le $2.2piliona tālā ‘o ‘aitālafu, ‘o nonōgātupe ‘a tamaiti mai fafo ma ‘o le to’atele ‘o i lātou ‘e aumau ‘i ‘Ausetālia. ‘E na’o le 29% ‘o nonōgātupe ‘a tamaiti ā’oga ‘i fafo na ‘ausia peimeni ma le togitogiina ‘o ā lātou ‘aitālafu ‘i le 12 māsina talu ai. ‘E $116miliona tālā na fa’asoa ‘e le ‘ōfisa ‘o lāfoga mai ‘i le Tala ‘o le Tupe ‘o le tausaga nei, ‘e fa’amālosia ai le tausisia ma le fa’amālosia ona toe totogi mai ‘o ‘aitālafu ‘a fānau ā’oga.

Fa’aalia ‘e le pule sili ‘o le vāega ‘o māketi ma feso’ota’iga ‘a le IRD Andrew Scott, ‘e fa’apea, ‘e lē ’o silafia ‘e tagata na faia ā lātou student loans ma aga’i ‘i atunu’u ‘i fafo, le fa’aopoopo pea ‘o tului ‘i ‘aitālafu pe ‘ā lē totogiina, peita’i, ‘o ‘i lātou ‘e i le vā ‘o le 40 ‘i le 50 tausaga le mātutua, lea ‘e tele ina lē toe totōgia student loans. ‘Ua iai ‘au’aunaga ‘e aoina ‘aitālafu ‘i Peretānia ma ‘Ausetālia, ‘o lo’o tau sā’ilia tagata nei. ‘E tusa ma le 7000 īgoa na fa’asoa atu ‘i se ‘au’aunaga ao ‘aitālafu ‘i ‘Ausetālia ‘i le kuata muamua ‘o le tausaga nei, ma e o’o mai ‘i le taimi nei, ‘ua o’o atu ‘i le to’a 1000 ‘ua ‘amata ona togitogi ‘aitālafu. ‘O le ‘ā taumafai fo’i le ‘ōfisa ‘o lāfoga ‘e ‘ave nisi ‘o matā’upu ‘i fa’amasinoga, ma e ono mafai ai ona ‘ave’ese fa’amālosi mai tupe mai ‘i totogi ‘o ia tagata, pe ‘ā lē usita’ia tusi ma fe’au tusitusia ‘e tu’uina atu ‘e ‘au’aunaga. ‘O le ‘ā logoina atu ‘e le ‘ōfisa ‘o lāfoga tagata Niu Sila ‘e toe taliu mai ‘i Niu SIla, pe ‘ā ‘ō iai se aitālafu ‘e silia ma le $1000. ‘E tusa ‘o le 10,000 mai le 110,000 ‘o tagatānu’u Niu SIla na iai ‘aitālafu ‘i le IRD, ‘ua toe fo’i mai ‘i Niu Sila. 

Link to RNZ (Article) translated by Anna Fa’asolo: https://www.rnz.co.nz/news/national/533749/inland-revenue-calls-in-debt-collectors-over-overseas-student-debt

ATA: RNZ