Vala’au ‘ia toe fa’aopoopo le taimi mō finagalo fa’aalia ‘i le Treaty Priniciples Bill
‘Ua vala’au le Vāega Fa’a’upufai ‘a le Labour ‘ina ‘ia toe fa’aopoopo le taimi fa’atapula’aina mō finagalo fa’aalia ‘e uiga ‘i le Pili ‘o le Treaty Principles, lea ‘e fa’aulu atu ‘i luga ‘o ‘upega ‘o feso’ota’iga, ‘ona ‘o līpoti ‘e uiga ‘i fa’afītāuli na feagai ma tagata ‘i luga ‘o le ‘upegatafā’ilagi ‘ina ‘ua fa’aulu o lātou finagalo fa’aalia ‘i le aso mulimuli.
Na līpotia ‘e le Leitiō Niu Sila ni fa’amatalaga ‘a nisi ‘o le atunu’u na fa’aulu o lātou finagalo fa’aalia po’o submissions ‘e uiga ‘i le pili ‘i le pō ‘o le Aso Gafua ma le Aso Lua, ‘e fa’apea na iai ni mea sesē po’o ni fa’alētonu ‘i le tēkonolosi ‘a’o fa’aulu a lātou finagalo tusitusia. ‘O le taimi ‘e fa’agataina ai finagalo ‘uma ‘e fia fa’ao’o atu a lātou submissions ‘e ala atu ‘i luga ‘o ‘upega ‘o feso’ota’iga, ‘o le toe tasi le minute ‘i le 12 ‘i le vaeluaga ‘o le pō ‘o le Aso Lua, 7 Ianuari. Peita’i, ‘o le taimi fa’agataina mō pepa ‘ua māe’a ‘ona lolomiina, ‘e tatau ‘ona o’o atu ‘i le ītūlā ‘e 5 ‘i le afiafi ‘o le asō, ‘ua fa’ao’o atu ‘i le Palemene.
Na fa’aalia ‘e le so’o’upu ‘a le Labour mō ātina’e ‘a Māori, Willie Jackson, ‘e talafeagai le toe fa’aopoopo ‘o se vāiaso. ‘E tatau ‘ona maua le avanoa mō tagata ‘uma ‘o Niu Sila, ‘e lē na’o Māori, ‘e fa’aulu atu ai o lātou finagalo ‘e uiga ‘i le Treaty Principles Bill, po’o le Tūlāfono Taufa’a’ofi ‘a le Mālō, ‘e uiga ‘i le toe fa’atūlagaga ‘o le agaga ‘autū ‘o le Feagaiga ‘o Waitangi. ‘O se pili ‘e matuā to’atele tagata na tete’e ‘i ai, ma māfua ai le solo tele po’o le hīkoi lea sā ‘āuai le faitau fia sefulu afe ‘o tagata āga’i atu ‘i le maota ‘o le palemene ‘i le tausaga na te’a nei.
‘E i le Komiti Fa’apalemene, le Justice Select Committee le fa’ai’uga ‘e toe fa’aopoopo ai le aso ‘e fa’agata ai finagalo po’o submissions ‘i le pili.
Link to RNZ (Article) translated by Savelina Kasiano: https://www.rnz.co.nz/news/political/538401/extension-of-treaty-principles-bill-submissions-deadline-called-for
Labour’s Willie Jackson says a week extension of the deadline would be fair. ATA:RNZ / Samuel Rillstone