Vāea nisi tagata faigāluega ‘a le Matāgāluega ‘o Tū ma Aganu’u ‘a Niu Sila

‘E to’atele nisi tagata faigāluega ‘a le Matāgāluega ‘o Tū ma Aganu’u, ‘o le ‘ā vāea mā ‘o le ‘ā lēai ni a lātou gāluega, ‘i se taimi lata mai.  ‘Ua māfua lea ‘ona ‘o le fa’aitīitia ‘o vaegātupe fa’a-agaga mō lea ‘ōfisa ‘o le mālō.

Na fa’aalia ‘e fa’apea ‘o lātou ‘o le ‘ā āfāina ‘i lea vāea, ‘o tagata ia ‘o lo’o gālulue ‘i le vāega ‘e fa’amaumauina le tala fa’asolopito fa’apea ai ma isi ‘i le vāega ‘e gaosia polokalame mō feso’ota’iga televavave, ‘o ni ‘au’aunaga ‘e fa’aaogāina tele ‘e ā’oga fa’apea ai ma le lautele ‘o le atunu’u.

‘O le matāgāluega lenei le Manatū Taonga, po’o le Ministry of Culture and Heritage, ‘e $2-miliona na fa’aitīitia ‘o la lātou tala ‘o le tupe sā fa’atalosagaina, ‘i le Tala ‘Autū ‘o le Tupe talu ai nei ‘a le Mālō, ma ‘ua fa’ailoa mai ai ‘e le pūlega, ‘o le ‘ā vāea ma fa’amālōlō le aofa’iga ‘e to’a 24 ‘o le ‘aufaigāluega, pē tusa lea ‘o le 15 pasene ‘o lana ‘aufaigāluega ‘ātoa.

‘O le Fa’atonu sili ‘o le matāgāluega lenei, ‘o le afioga Laulu Mac Leauanae, lea na ia tā’ua, ‘o le fa’aitīitia ‘o vaegātupe fuafuaina mō gāluega fai, ‘e mautinoa le tele ‘o le āfāina ai ‘o le ‘au’aunaga ‘a lea matāgāluega ‘a le mālō.

Ma na ia fa’aalia mai ‘o le ‘ā fa’agāsolo talanoaga ma le ‘aufaigāluega ‘o lo’o a’afia ‘i lenei matā’upu.

Link to RNZ (Article) translated: https://www.rnz.co.nz/news/political/564045/more-cuts-proposed-at-ministry-for-culture-and-heritage

ATA: RNZ / Quin Tauetau