Va’aiga ‘i totonu ‘o le Wellington Town Hall talu mai le 13 tausaga na tāpunia ai

‘Ua o’o ‘i le vāega fa’ai’u ‘o le toe fa’aleleia ‘o le maota tele ‘o le Wellington Town Hall lea ‘ua faitau miliona tupe ‘ua ‘ova atu ai nai lō le tupe na ulua’i fuafuaina mō lea gāluega. 

Na o’o atu le āsiasiga ‘a le Leitiō Niu Sila ‘i totonu ‘o lea maota ‘i le Aso Lua, ‘a’o fa’agāsolo gāluega.  ‘O le fa’amoemoega ‘o le toe ātia’ega ‘o le maota, ‘ina ‘ia fa’agalo ma fa’ate’a ai ni fa‘afītāuli ma fefīnaua’iga na tūla’i mai ‘ona ‘o lea fale, ‘ae ‘avea ma suiga tele ‘e fa‘aleleia ātili ai le soifuaga fa‘aleaganu‘u ma fa‘afiafiaga ‘i totonu ‘o le taulaga ‘o Uēligitone.

‘O lo‘o tū le fale ‘i luga ‘o ‘ona fa‘avae simā tuai ‘i luga ‘o se laufanua na toe tanu ma ‘o le tausaga ‘e 2013 na fa‘ailoa ai ‘ua lē saogalēmū le fale pe ‘ā lūlū se mafui‘e.

‘O le tala fa‘atatau muamua ‘o le tau ‘o le gāluega ‘e tusa lea ma le $43 miliona. Peita‘i, na lē tasi le taimi na si‘itia ai le tau ‘o le gāluega, ma i‘u ai ‘ina latalata ‘i le $330 miliona le tupe na fa‘atatauina ‘e le Pūlēgānu’u ‘a le ‘A’ai ‘o Uēligitone (Wellington City Council).

Na fa’aalia ‘e le pūlēgānu’u, ‘o lo’o fa’agāsolo pea ‘ona fa’avasega le tala ‘o le tupe ‘o le gāluega, peita’i na tā’ua ‘e le pule ‘o le polokalame mō le Te Ngākau, ‘o le vāega fa’ai’u ‘o le gāluega, ‘o lo’o va’ava’ai pe tusa ma le $20 miliona ‘i lalo ‘o le pāketi pito lata mai, mā ‘e fai si tele ‘o lu’itau ‘o le faiga ‘o le gāluega.

‘E toe tatala le Town Hall ‘i le aso 20 Fepuari ‘i le 2027, ma ‘ua taulia ‘uma pepa ulufale ‘o se fa’afiafiaga ‘o le ‘ā faia ai, ‘a le Drax Project ma Bret McKenzie.

Link to RNZ (Article): https://www.rnz.co.nz/news/regions/2508279/inside-the-wellington-town-hall-after-13-years-shut

IMAGE/ATA: RNZ / Mark Papalii