‘Ua pau lava ‘o le finagalo ‘o le Atua: Nu’ulua Fa’aofo ‘i le maliu ai ‘o si ona to’alua ‘iā Fa’aofo Uili Fa’aofo

‘I se fa’atalanoaga fa’apitoa ‘a le Leitiō Pāsefika ma le Faletua ‘iā Nu’ulua Fa’aofo, ‘o le to’alua ‘o le tamā ‘iā Fa’aofo Uili Fa’aofo (45), ‘o se tasi na maliu ‘i le fa’alavelave tauta’avale ‘i le vaiaso na mavae atu nei lea nā māliliu ai fo’i ma ona tei (nephews).

Na saunoa le Faletua ‘iā Nu’ulua, na ia talanoa ‘i le tamā ‘iā Fa’aofo la te o fa’atasi ‘e piki mai ona tau’aiga na gālulue ‘i gāluega fa’avaitaimi ‘i le Aso Gafua, ‘ae fai atu Fa’aofo ‘iā te ia, ‘e “‘aua le popole, lā te malaga fa’atasi ma Iesu, ‘ae fa’amuli atu ma ‘ave tamaiti ‘i le ā’oga.” Na molimau le faletua ‘iā Nu’ulua, ‘ua pau lava “’o le finagalo ‘o le Atua.”

Na fa’amatala ‘e Nu’ulua, ‘o si ona to’alua ‘o se tamā ‘e gālue mālosi ma ‘o ia ‘o le sifi kuka ‘a si o lātou ‘aiga, ma ‘e lelei lava lana kuka.

Na fa’ailoa fo’i ‘e le Faletua, ‘o le fa’ai’uga ‘o le tausaga nei na fa’amoemoe ‘e faia ai lona nofo ‘i se tasi ‘o suafa matai, ‘ae pagā lea ‘ua le tau lau ‘o lea fa’amoemoe.

‘Ia fa’amaise pea le Agaga ‘o le Atua ‘i le Faletua ‘iā Nu’ulua ma le fānau, fa’apea ‘aiga ‘uma ‘o lo’o feagai ai ma le fa’anoanoaga ‘ona ‘o lenei fa’alavelave na tūla’i mai ‘i le vaiaso na mavae atu nei.

Link to RNZ Pacific (Article & Exclusive Interview) translated by Murray Faivalu: https://www.rnz.co.nz/international/pacific-news/526817/god-s-plan-nu-ulua-fa-aofo-widow-of-auckland-horror-crash-victim

ATA/Video:
Video Credit: RNZ Pacific
Grace Tinetali-Fiavaai, Journalist
Video: Calvin Samuel / RNZ
RNZ partnership with Sāmoa Capital Radio