Ua fa’asā ‘e le Pūlega ‘o le Falema’i tele ‘o Waikato le fa’aaogāina ‘o nisi gagana se’ia vaganā le ‘ilgilisi ‘e tausi soifua

‘Ua fa’asā ‘e le Pūlega ‘o le Falema’i tele ‘o le itūmālō Waikato, ‘ia tausi soifua ‘o lo’o gālulue ai, ‘ina ‘ia ‘aua ne’i toe fa’aaogāina se isi lava gagana, se’ia vaganā ai le ‘Igilisi ‘e talanoa ai ‘i ma’i.

‘O le Aso Faraile na te’a nei sā fa’ata’amilo ai ‘i tausi soifua ‘uma ‘o lea falema’i tele, se tusi āloa’ia mai le Pūlega, ‘o lo’o tā’ua ai le tatau lea ‘i le’ aufaigāluega tausi soifua ‘ona fa’aaogā na’o le gagana Peretānia ‘i totonu ‘o le falema’i ma le fa’atinoina ‘o lātou tiute, ‘ina ‘ia mautinoa ai le saogalēmū ‘o togafitiga ‘o ma’i.

Sā tā’ua ai ‘i lea tusi, popōlega ma atugaluga ‘o le pūlega ‘i le tele ‘o nisi gagana ‘ua mātauina le fa’aaogāga ‘e le vasega ‘o tausi soifua ‘e talanoa ai ‘i ma’i.  Peita’i lā, ‘o se līpoti ‘a le Uaeālesi Fa’asalalau ‘a Niu Sila (RNZ), na tā’ua ai ‘e se tasi ‘o fōma’i ‘ua va’ai ‘i lenei tusi, ‘e fa’apea, ‘ua manino mai ‘o tausi soifua ‘Initia, ma Filipino fa’apea ma le Pasefika, lea ‘e fa’a’autū ‘i ai lenei fa’atonuga.  Na tā’ua ‘e lea fōma’i, ‘o tausi soifua nei ‘e aupito ‘i gālulue mālolosi, ‘a’o lea ‘ua fōliga ‘ua fa’asalaina ‘i lenei fuafuaga.

‘O le tusi po’o le memo lenei, ‘e fōliga mai ‘e na’o le Falema’i tele ‘o Waikato ‘o lo’o fa’apitoa ‘i ai, ‘o se gāioiga ‘ua soso’o ma le fa’afaigāluegaina ‘e le Matāgāluega ‘o le Soifua Mālōlōina, le Te Whatu Ora, ‘o le faitau afe ‘o tausi soifua fa’aopoopo mai atunu’u ‘o ‘Āsia, ‘ona ‘o le to’agaogao ‘o lea vāega ‘o lana ‘aufaigāluega, ‘ae ‘ua ‘avea ma mea ‘ua ‘’ova ai ana tupe fa’aalu mai le Tala ‘o le Tupe na pāsia, ‘i le faitau fia selau miliona Tālā.

‘E aliali mai lenei matā’upu ‘i le falema’i ‘o le Waikato, ‘i nai aso talu se līpoti ‘a le nusipepa ‘o le Herald, lea na tā’ua ai le talosaga ‘a se ma’i ‘i le falema’i tele ‘i North Shore, ‘e lē mana’o ‘e va’aia pē togafitia ‘o ia ‘e se tausi soifua mai ‘Āsia, ‘o se talosaga na talia lelei ‘e le pūlega ‘o lea falema’i, ‘ae lē fiafia ai le aufaigāluega.

Link to RNZ (Article) translated by Lauano Ati Ilaoa: https://www.rnz.co.nz/news/national/530752/waikato-hospital-staff-told-to-speak-english-only

ATA: RNZ