Ū tua ‘o tausi soifua ‘i le lāuga ‘a le Minisitā ‘o le Soifua Mālōlōina

Na ū tua ‘o sui ‘o le Fa’alāpotopotoga ‘a tausi soifua ‘i le Minisitā ‘o le Soifua Mālōlōina ‘i le taimi na fai ai lana saunoaga ‘i la lātou koneferenisi.  Na saunoa Simeon Brown ‘i lea fa’atasiga ‘i le Te Papa ‘i Uēligitone, ‘o le tete’e ‘a tausi soifua, ‘ua āfāina ai tagata gasegase. 

‘E fa’atāua ‘e le mālō le gāluega ‘a tausi soifua, ma ‘uā ia ūna’iina ai le iuni ‘ina ‘ia fa’amuamua tagata gasegase.  Na saunoa Rangi Black-Tufi, lē na ta’ita’ia le tete’e ‘e le’i fuafuaina, na oso lona ita ‘ona ‘o le taumafaiga ‘a le minisitā ‘e fōliga ‘e fa’atupu se lagona salamō ‘i tausi soifua ‘e pei ‘o i lātou ‘ua māfua ai, peita’i, ‘e a’afia lava gasegase ‘i aso ‘uma ‘ona ‘o le lē lava ‘o le ‘aufaigāluega ma le lē lava ‘o tupe. 

‘O le lua vāiaso talu ai, na faia ai le tete’e ‘a le to’a 36,000 ‘o tausi soifua, fa’atōsaga ma ē ‘e fesoasoani ‘i le tausiga ‘o gasegase mō aso ‘e lua, ‘ona ‘o le lē lava ‘o totogi ma ‘ia fa’aopoopo le ‘aufaigāluega.

‘O le Aso 2 Sētema, le aso muamua ‘o le tete’e ‘a tausi soifua, na fa’atepa ai tausi soifua na i fafo ‘o le ‘ōfisa fa’aitūmālō ‘o Brown, ‘i ni fa’ailo na fa’apipi’i ‘i fa’amalama ‘o tūsia ai ni fa’a’upuga, ‘e fa’apea ‘ua āfāina le silia ma le 13,000 ‘o ta’otoga ma siaki ‘i fōma’i ‘ona ‘o le tete’e ‘a le iuni.

‘O se līpoti na fa’alauiloaina ‘i le aso ananafi ‘a le Infometrics na māua ai pe tusa ma le 587 le fua fa’atatau ‘o le nūmera na lē lava ai tausi soifua ‘i sifi ta’itasi ‘i le tausaga talu ai.  ‘O lea līpoti na fa’aigoaina ‘o le ‘How many more nurses does New Zealand need?, ma na fa’avae ‘i luga ‘o fa’amaumauga ‘a le Te Whatu Ora mai sifi ‘e 1.69 miliona ‘i le vā ‘o le 2022 ma le 2024 ‘i falema’i ‘e 59 ‘a le mālō. 

Link to RNZ (Article): https://www.rnz.co.nz/news/national/573302/nurses-turn-their-backs-on-health-minister-during-speech

ATA: RNZ / Ruth Hill