Tu’umālō le Tupu Māori; Kiingi Tuheitia, 69 tausaga

‘O le 69 tausaga ‘o le soifua ‘o le Tupu ‘o Māori, Te Arikinui Kiingi Tuheitia, lea ‘ua tu’umālō ai nei.  Na fa’ailoa ‘i se pepa ‘o fa’amatalaga, le tu’umālō ai ‘o Kiingi Tuheitia ‘i le vaveao analeilā.  Sā suitūlaga ‘i lona tinā, ‘o Te Arikinui Dame Te Atairangikaahu, ‘ina ‘ua tu’umālō ‘i le tausaga ‘e 2006. 

‘O Kiingi Tuheitia ‘e lona fitu ‘i le ta’ita’iga ‘o le Kiingitanga, lea na fa’avaeina ‘i le 1858.  Na soifua a’e ‘i Waahi ‘e lata ‘i Huntly.  Ma na ‘āmata ana a’oa’oga ‘i Rakaumanga ‘ina ‘ua valu tausaga ‘o lona soifua, na ave ‘i se ‘ā’oga papālagi ‘i Hamilitone ‘a’o le’i ‘auina atu ‘i se ā’oga nofo tūmau ‘a le Kolisi ‘a St Stephens.  Na ‘ave lana tausaga mulimuli ‘i le Kolisi ‘a Huntly ma faigaluega ai ‘i ni gāluega ‘ese’ese.  Na ulufale ‘i le militeli ma tautua ai mō tausaga ‘e tolu ‘a’o le’i galue ‘i le Huntly Power Station.  ‘E ui ‘o ia le tama matua ‘a Dame Te Ata, ‘ae na iai lona talitonuga ‘o le ‘ā sē’ei atu lona tuafafine matua ‘o Heeni ‘e suitūlaga ‘i lona tinā ‘ae na fa’ato’ā ia iloa ‘o ia ‘e ta’ta’ia le ‘āiga tupu ‘ina ‘ua lata ‘ina tu’umālō le tupu tama’ita’i. 

‘E to’alima ona uso ma lona tuafafine ‘e to’atasi.  Sā a’afia ‘i ni gasegase ‘e aofia ai le kānesa ma le ma’i suka.  ‘O le māsina nei lea sā fa’amanatuina ai le 18 tausaga talu ‘ona fa’au’uina ‘e ‘avea ma tupu ‘o Māori.  Na fa’aalia ‘e le so’o’upu ‘a Kiingi Tuheitia, ‘o le tu’umālō ‘o le tupu, ‘o se fa’anoanoaga tele lea mā Māori ma le atunu’u ‘ātoa.  ‘O le ‘ā ta’oto lona tino maliu ‘i le Turangawaewae Marae mō aso ‘e lima ‘a’o le’i momoli atu ‘i lona nofoaga mau ‘i le Taupiri Mountain pei ‘ona fa’aalia ‘i se pepa ‘o fa’amatalaga.  ‘Ua tele fa’amaisega ‘ua fa’ao’o atu ma fa’aleo ‘i le tu’umālō ai ‘o le tupu Māori ‘e lē gata mai totonu lava ‘o le atunu’u ‘ae fa’apea fo’i ‘i fafo atu ‘o Niu Sila.

Link to RNZ (Article) translated by Savelina Kasiano: https://www.rnz.co.nz/news/te-manu-korihi/526570/obituary-tuheitia-pootatau-te-wherowhero-vii-maori-king-dies-at-69

ATA: RNZ.