Tu’ua’ia ‘Ea Niu Sila ‘i taugatā

‘Ua iai ni tu’ua’iga ‘e fa’asaga ‘i le ‘Ea Niu Sila ‘i le taugatā tele ‘o pāsese mō malaga ‘i ‘Ausetālia.  Na māta’itū ‘e le Consumer NZ nisi ‘o faigāmalaga alu ma toe fo’i mai ‘a le ‘Ea Niu Sila, mō se ‘āiga ‘e to’afā, ‘i se ‘umi ‘e 18 vāiaso se’i va’ava’ai po’o le ā le tūlaga ‘o tupu ‘i tau ‘o pāsese ‘i taimi ‘o tu’uaga ‘o a’oga.  ‘I se fa’amatalaga ma fa’amaumauga ‘a le Consumer, na iloa ai, ‘o malaga ‘i taimi ‘o tu’uaga ‘o ā’oga, ‘e tusa ma le 167 pasene na taugatā atu ai, nai lō vāiaso ‘e tolu muamua atu.  ‘A fa’atusatusa ‘i tau ‘a le Qantas ‘i le piliota lava lea ‘e tasi, na tūlaga lua le ‘Ea Niu Sila. 

Na fa’aalia ‘e Jon Duffy ‘o le pule sili ‘o le Consumer NZ ‘i le Checkpoint, na o lātou va’ava’ai ‘i faigāmalaga ‘i le vā ‘o ‘a’ai ‘autū fa’apea ai ma Melepone ma Brisbane.  Ma sā taugatā pāsese peita’i, na tēte’i ‘i le matuā taugatā lava ‘o malaga ‘a le ‘Ea Niu Sila, 43 pasene ‘e maualuga atu ai nai lā pāsese ‘a le Qantas.  ‘O Niu Sila le isi atunu’u ‘e pito maualalo lava le tūlaga ‘o tauvaga ‘i ‘au’aunaga ‘o fela’ua’iga ‘o pāsese ‘i le ‘ea pei ‘ona fa’aalia ‘e Duffy.  ‘E ‘ioe le Consumer NZ ‘e ao ‘ona maua fo’i ni polōfiti ‘a le kamupanī va’alele ma sā feagai fo’i ma le tele ‘o lu’itau ‘e pei ‘o le fa’aleleia ‘o va’alele.  Na fa’aalia ‘e Duffy ‘e mo’omia le tagataga’i ‘i ai ‘o le Commerce Commission ‘i le tūlaga ‘o le māketi pē ‘o iai ni gāioiga ‘o lo’o matuā tasi’i lē talafeagai ai tau ‘o pāsese.

Link to RNZ (article) translated by Savelina Kasiano: https://www.rnz.co.nz/news/business/531683/consumer-nz-calls-for-inquiry-into-air-nz-new-zealand-pricing-model

Ata: Air NZ – Consumer NZ research found Air NZ flights in the school holidays were up to 167 percent more expensive than in the three weeks prior.