Tutuli ‘ese tagata faigatā mai Fale ‘o le Mālō NZ

‘Ua fa’ailoa mai ‘e le Minisitā ‘o Fale, ‘o Chis Bishop, ‘o lona talitonuga, ‘e tatau ‘i le Kainga Ora, ‘ona tutuli ‘ese mai tagata faigatā ‘o lo o nofoia fale ‘o le Mālō, ‘ina ‘ia fa aitīitia ai le aofa’i ‘o tagata ‘ua fa’amatalaina ‘o leaga ma āmio fa’alētonu ‘o lo’o nonofo ai ‘i fale nei ‘o le mālō.

‘O le māsina ‘o Mati lea na poloa’iina ai ‘e le Mālō So’ofa’atasi, le Kainga Ora, ‘ina ‘ia fa’amuta le faiga sā pūlea ai muamua fale ‘o le mālō, ‘e tā’ua ‘o le sustaining tenancies framework, ‘ae ‘ia fa’amālosia ana pūlega ‘o fale ‘e nofoia ‘e tagata ‘e āmio faigatā ma fa’alētonu lō lātou tausiga ‘o ia fale.

‘I totonu ‘o le tolu māsina ‘ua mavae atu nei, ‘e 14 le aofa’i ‘o ‘āiga ma tagata sā nofoia fale ‘o le mālō na fa’amuta ai lō lātou nofoia ‘o ia fale, ‘ona ‘o āmioga lē lelei ma le tele ‘o taimi ‘ua lē totōgia ai a lātou rent…..’e fa’atusa lea ‘i le nā ‘o le to’a valu ‘o ‘āiga na tutuli ‘ese mai fale ‘o le mālō sā nonofo ai ‘i le tausaga ‘ātoa ‘e 2023. Sā fa’amamafaina mai ‘e le ali’i minisitā ‘iā Chris Bishop, ‘e tatau lava ‘ona iai ni fuafaga fa’apea ‘e faia ‘i tagata ‘e fa’afītāuli ma faigatā āmioga, ‘o lo’o nonofo ‘i fale ‘o le Kainga Ora.

Na ia tā’ua ‘o lalo ‘o le faiga tuai sā pūlea ai fale ‘o le mālō, ‘e lēai ā se mea na faia’ i tagata ‘e āmio lē pūlea ma āmio pa’a’ā ‘e āfāina ai isi tagata ‘e nofoia fale ‘o le mālō, ma ‘o lea tūlaga ‘ua tatau ‘ona fa’amuta. Mā ‘o le faiga fa’avae fou ‘ua iai nei, ‘ua vave ai ma faigōfie ‘i le Kainga Ora, ‘ona fa’amuta le avanoa ‘o tagata fa’apea, ‘e nonofo ai ‘i fale ‘o le mālō.

ATA: RNZ.