Tusi le Labour ‘i le Palemia ‘ina ‘ia fa’apāsia tūlāfono ‘o faiga fa’apologā muamua ‘i le faigāpālota

‘Ua tusi atu ma le fa’anaunau le faipule ‘o le Labour, Camilla Belich, ‘i le palemia, ‘ina ‘ia taumafai ‘e fa’apāsia le tūlāfono ‘e faia fa’asaga ‘i faiga fa’apologā ‘o ‘aso nei, ‘a’o le’i faia le faigāpālota tele.

‘Ua tusi atu fo’i ‘i le komiti mō pisinisi, lea ‘e faia le fa’ai’uga ‘i le fa’atūlagaga ‘o gāluega ‘a le Palemene ma sā fono ‘i le aso ananafi.

Na fa’aalia ‘e līpoti, ‘ua tutū fa’atasi ni fa’alāpotopotoga ‘e lē sa’ilia ni polōfiti, ‘e ūna’ia le Palemia Tuisinavemauluomotootua Christopher Luxon ‘ina ‘ia fīnau mālosi ‘e fa’apāsia le tūlāfono ‘i le Palemene ‘a’o le’i fa’ata’ape le Palemene ‘i le vāiaso nei, mō le faigāpālota. 

‘O le tausaga ‘e 2022, na saunoa ai Tuisinavemauluomotootua Luxon, ‘o le matā’upu ‘e uiga ‘i faiga fa’apologa fa’aonapō nei, ‘o le ‘ā savali ai ‘i magāala peita’i, ‘o le Aso Gafua na saunoa ai, ‘ua lē lava le taimi ‘e talanoaina ai, peita’i, ‘ua iai lona taumauga ‘e toe fa’afo’i atu ai ‘i gāluega ‘a le palemene, pe ‘ā fai ‘e toe pale mai le National. 

Na fa’asino ‘e le ‘ōfisa ‘o le palemia ni fesili ‘a le Leitiō Niu Sila, ‘i le ta’ita’i ‘o le Maota, Louise Upston, ‘ae na saunoa le faipule, ‘ua toe līpoti ane ‘i le Maota le pili, mai le Komiti fa’apalemene, ‘i se taimi tonu, ‘ua lē lava ai aso mō sui ‘e pāsia ai le pili ‘i lona vāega mulimuli. 

‘O Belich sā fīnauina mālosi lea tūlāfono tau fa’aofi, na gālulue fa’atasi ai ma le faipule ‘o le National, Greg Fleming, ‘ina ia ofi atu se pili ‘a se sui faipule ‘e ui ‘i le tete’e mālosi ‘o le ACT. 

Link to RNZ (Article): https://www.rnz.co.nz/news/politics/1520670/labour-writes-to-pm-with-plea-to-pass-modern-slavery-laws-before-election

IMAGE/ATA: Samuel Rillstone / RNZ