Tūlāfono ‘e fa’afaigōfie ai fa’asalalauga fa’apisinisi ‘i Aso Sā ma aso mālōlō ‘au’aunaga fa’asalalau

‘Ua āga’i le mālō ‘e tatala le faiga ‘o fa’asalalauga fa’apisinisi ‘i Aso Sā ma aso mālōlō ‘i luga ‘o ‘au’aunaga fa’asalalau māsani.  Na folasia ‘i le Aso Lua le tūlāfono ‘e mafai ai ‘ona ‘ave’esea pā puipui ‘uma ‘o fa’asalalauga fa’apisinisi mō ‘au’aunaga fa’asalalau.  ‘O le taimi nei, ‘e fa’asā ‘ona faia ni fa’asalalauga fa’apisinisi ‘i luga ‘o televise ‘i Aso Sā ma taeao ‘o le Anzac Day ‘i le vā ‘o le 6 ‘i le taeao ma le aoauli.  ‘E fa’asā fo’i ‘ona faia ni fa’asalalauga fa’apisinisi ‘i le Aso Kerisimasi, Aso Faraile Pa’ia (Good Friday) ma le Aso Sā ‘o le ‘Ēseta, ‘i luga ‘o televise ma leitiō.

Na saunoa le Minisitā mō ‘Au’aunaga Fa’asalalau, Paul Goldsmith, ‘o lea suiga, ‘o le ‘ā mafai ‘ona maua ai ni tupe pe tusa ma le 6 miliona tālā mō ‘au’aunaga fa’asalalau, ia ‘o lo’o feagai ma tūlaga faigatā ‘i le taimi nei.  Na ia tā’ua fo’i, ‘ua lē toe ō gatasi ‘ia faiga ma le tūlaga ‘o lo’o fa’aaogāina ai ‘e tagata lautele ni fa’asalalauga, ‘ona ‘ua āga’i ‘ese fo’i tagata ma le tēkonolosi mai fa’asalalauga māsani. 

Link to RNZ (Article) translated by Savelina Kasiano: https://www.rnz.co.nz/news/political/536256/legislation-paves-way-to-relax-advertising-rules-for-media

ATA: RNZ / Samuel Rillstone.