Tufa ‘i pusa mea’ai ni lole ‘o iai totonu vailā’au fa’asāina

Na tufatufaina ‘i ni pusa ‘o taumafa ‘e le Auckland City Mission, ni lole ‘o iai le vailā’au fa’asāina ‘o le methamphetamine, ‘o ni lole na fa’ameāalofa atu ‘e se tagata ‘o le atunu’u. 

Na logoina le fa’alāpotopotoga, ‘ina ‘ua līpoti ‘e se tagata ‘e fa’apea ‘e ‘ese lava le tofo ‘o ia itū’āīga lole.  Na fa’aalia ‘e le Fa’alāpotopotoga ‘o le Drug Foundation, ‘o se lole na su’esu’eina, sa maua ai le 3 kalama ‘o le meth, mā ‘o le telē ‘o lea vailā’au, ‘e ono fa’a’umatia ai se soifua.  Na fa’aalia ‘e le fa’atonu sili ‘o le Drug Foundation, Sarah Helm, ‘o le telē ‘o le vailā’au ‘o le meth ‘e masani ai pe ‘ā foloina, ‘e i le vā ‘o le 10-25milikalama, ‘o lona uiga, ‘o le lole lea na su’esu’eina, ‘e o’o atu ‘i le 300 doses po’o le tele ‘o le vailā’au ‘o lo’o iai.  ‘Afai ‘ae folo ‘ese tagata le tele ‘o lea vailā’au ‘o le methamphetamine, ‘e matuā mata’utia lava, mā ‘e ono maliu ai lava le tagata.  ‘I se pepa ‘o fa’amatalaga, na tā’ua ai ‘e le City mission, ‘o pineapple lollies ‘o le itū’āiga ‘o le Rinda sa i totonu ‘o se tagata pepa fa’atau na tāpuni mau, sa fa’ameāalofa atu ai se tasi, ‘ae le’o iloa po’o ai fo’i lea tagata.  ‘O lo’o fa’afeso’ota’i tagata na ono tufatufa ‘i ai ia lole ma fa’ailoa ‘i ai le fa’afītāuli ma fa’ailoa ‘i ai le la’asaga ‘e ao ‘ona fai.  Na tā’ua fo’i ‘e le City Mission, na’o ‘oloa gaosi mai kamupanī ‘o lo’o fa’atauina atu taumafa, lātou te taliaina.  ‘O lo’o galulue fa’atasi ma le Drug Foundation fa’apea ma leoleo ‘e uiga ‘i le matā’upu.

Link to RNZ (Article) translated by Savelina Kasiano: https://www.rnz.co.nz/news/national/525066/lollies-containing-meth-donated-to-auckland-city-mission-distributed-in-food-parcels

ATA: Supplied (Auckland City Mission) / RNZ.