Tuai ‘ona totogi lāfoga (rates) ‘a le faitau afe ‘i ‘Aukilani

‘E silia ma le 34,000 le aofa’iga ‘o tagata ‘Aukilani ‘e tuai ‘ona totogi a lātou rates po’o lāfoga ma ‘o lo’o līpotia fo’i le fuafuaga ‘a le Pūlēgānu’u ‘a ‘Aukilani ‘e fa’atau fa’amālosi ‘ese atu ai se fale, ‘ona ‘ua lē mafai ‘e le tagata ‘e ona le fale ‘ona totogi ana ‘aitālafu ‘o lāfoga ‘e toluselau sefuluvalu afe tālā ($318,000).

‘Ua 19 tausaga ‘e le’o totogiina lava lāfoga po’o rates ‘o lea fale ‘i Otara, talu mai le tele ‘o tausaga ‘o taumafai ‘e fa’afeso’ota’i le tagata ‘e ona le fale, ‘ae na mafai ‘ona toe maua le feso’ota’iga ma le pūlēgānu’u, ‘e ala atu ‘i se tagata ‘o lona ‘āiga.  Na tā’ua ‘e Ross Tucker ‘o le Pūlēgānu’u ‘a ‘Aukilani ‘i le Checkpoint ‘a le Leitiō Niu Sila, ‘e ogaoga tele lea matā’upu mā e seāseā ‘ona tūla’i mai se matā’upu faapea.  Sa o’o lava ‘i le fa’amasinoga peita’i ‘e lē tali atu lava le tagata ‘e ona le fale.  ‘O lo’o iai le fa’amoemoega ‘o le pūlēgānu’u ‘e gālulue fa’atasi ma le tagata ‘o le ‘āiga ‘e ona le fale, ‘ina ‘ia taofia ai le o’o atu ‘i se isi tūlaga ogaoga, ‘e pei ‘o le fa’amālosia ‘ona fa’atau atu ‘o le fale.  Peita’i ‘o le taimi nei, ‘o lo’o fa’agāsolo pea le fuafuaga ‘e fa’atau atu ai.  Na ‘āmata mai le ‘aitālafu ‘i le 30,000 tālā ‘ina ‘ua fa’ato’ā ‘āmata ‘ona gāioi atu ‘i ai le pūlēgānu’u ‘i le matā’upu pei ‘ona tā’ua ‘e Tucker.   Sa fa’aopoopoina lava fa’asalaga ‘i lāfoga ‘e tuai ‘ona totogi.  ‘O le fautuaga ‘a le pūlēgānu’u mo so’o se tasi o’ feagai ma faigatā ‘i le totōgiga ‘o lāfoga, ‘ina ‘ia vave feso’ota’i atu ‘e ‘āmata ai ‘ona lātou gālulue fa’atasi.

Link to RNZ (Article) translated by Savelina Kasiano: https://www.rnz.co.nz/news/national/523640/more-than-34-000-aucklanders-behind-on-rates

ATA: Unsplash / Tom Rumble (RNZ).