Tuai le toe fo’i ‘o tagata ‘i ‘āiga ‘ona ‘o ni fa’alavelave ‘i luga ‘o ‘auala tetele

‘O le to’atele ‘o tagata sā fia fo’i ‘i ō lātou ‘āiga ananafi ‘i le māe’a ai ‘o aso mālōlō sā feagai ai, ma le tele ‘o nai fa’alavelave ‘i luga ‘o ‘auala tetele, sā iloga ‘ona tuai ai le tūlaga ‘o femalagāa’iga māsani ‘o ta’avale ‘i le itūmālō ‘o le Waikato, fa’apea Uēligitone ma le  Homer Tunnel āga’i ‘i le Milford Sound ‘i le Motu ‘i Saute.

Sā tāpunia le ‘auala tele nūmera tolu, ‘e lata ‘i le ‘auala ‘o le Mokoia Road, ‘ona ‘o se fa’alavelave na a’afia ai ni ta’avale se lua ‘i le kuata ‘e te’a ai le 5 ‘i le afiafi ‘o le Aso Sā.  ‘E to’atasi le tagata na maliu ai ‘i lea fa’alavelave, ma le to’alima na mānunu’a, ‘e aofia ai le to’atasi ‘o lo’o tūlaga fa’alētonu ma le isi to’atasi ‘e manu’a tīgāina.

Sā tāpunia fo’i le Homer Tunnel ‘i le āga’i atu ‘i le Milford Sound, ‘ona ‘o se fa’alavelave tau ta’avale na tūla’i mai ai ‘i le Aso Sā ananafi.  ‘E lua ni ta’avale na a’afia ai ‘i lea fa’alavelave ‘i le ‘auala tele nūmera 94 ‘i Fiordland, pē tusa ‘o le kuata ‘i le 4 ‘i le afiafi, ‘e tusa ‘o le līpoti ‘a leoleo.  ‘E pei ‘ona silafia ‘o le Homer Tunnel, ‘ona pau lea ‘o le ‘auala ‘e āga’i atu ai ma toe fo’i mai ‘i le Milford Sound.

Na fa’ailoa mai ‘e le St Johns ‘e fa’apea ‘e to’aono tagata na mānunu’a ‘i lea fa’alavelave ‘e aofia ai le  to’atolu ‘e tīgāina ma sā ‘auina atu ‘i le falema’i mō togafitiga.  Pē tusa ‘o le ītūlā ‘e 4 ‘i le afiafi lava ‘o le Aso Sā, na līpotia mai ai le isi fa’alavelave ‘i mātū ‘o Uēligitone na poloka ai le feoā’iga ‘a ta’avale ‘i le ala tele nūmera tasi ‘i le matāfaga ‘o le Raumati Beach, ma sā fa’aaogāina ai le ‘auala tuai ‘e oso atu ‘i Paraparaumu ma Waikanae mō ta’avale, ‘a’o tau togafitia lea fa’alavelave. 

Muamua atu ‘i le itūmālō Waikato ‘e lua fa’alavelave tau ta’avale na tutupu ai ‘i le ala tele nūmera tasi ‘i Karapiro, fa’apea ai ma le ala tele nūmera 29 ma le Toman Road.

‘O nei fa’alavelave ‘uma sā telē lava se āfāina ai ‘o le toe fo’i atu ‘i ‘āiga ‘o tagata sā tāfafao ma fai mālōlōga ‘i isi itū ‘o le atunu’u ‘i le taimi ‘o aso mālōlō ma aso fiafia sā feagai ai, mai le Kerisimasi se’ia o’o mai ‘i le vāiaso muamua lenei ‘o le tausaga fou. 

‘Ua tu’uina mai ai ma se fautuaga fa’alaua’itele mō ‘aveta’avale ‘uma, ‘ina ‘ia fa’aeteete ma tautuanā le saogalēmū ‘i taimi ‘uma ‘i luga ‘o le ‘auala, ‘aemaise lenei vaitaimi pisi ‘o le tau māfanafana, ‘ina ‘ia mautinoa ‘e taunu’u ma le saogalēmū ‘i ‘āiga ma nofoaga ‘o lo’o fia malaga ‘i ai.

‘O le taimi nei, ‘o lea ‘ua o’o ‘i le 13 le aofa’iga ‘o tagata ‘ua fano soifua ‘ona ‘o fa’alavelave tau ta’avale ‘i le vā ‘o le aso 24 ‘o Tēsema ma le aso 3 ‘o Ianuari 2025.  ‘Ae ‘o le aofa’iga ‘e tūmau ‘o tagata na māliliu ‘i fa’alavelave tau ta’avale ma le tausaga ‘ātoa ‘e 2024, ‘o lo’o tūla’i mai ‘i le 291, ‘o se aofa’iga aupito ‘i maualalo lea ‘i totonu ‘o le sefulu tausaga.

Link to RNZ (Article) translated by Lauano Ilaoa: https://www.rnz.co.nz/news/national/538211/crashes-snarl-holiday-traffic-in-several-regions

 ATA:  RNZ / Richard Tindiller