Tolopō le sauniga ‘e āloa’ia ai pisinisi tau fale’aiga ma fale kalapu ‘a Uēligitone
‘O le fa’alētonu ‘o le tamāo’āiga ma le tele ‘o faigatā ‘ua feagai ma pisinisi ma ‘au’aunaga tau fa’afiafiaga, ‘ua māfua ai ‘ona tolopō ‘i le tausaga fou, le sāuniga fa’aletausaga ‘e āloa’ia ai tagata ma pisinisi tau fale’aiga ma fale kalapu ‘i totonu ‘o le laumua ‘i Uēligitone.
‘O se fa’aaliga āloa’ia mai ‘iā ‘i lātou ‘e feagai tonu ma lenei fa’amoemoe, na tā’ua ai, ‘o le sāuniga lenei ‘e fa’aigoaina ‘o le Felix Wellington Hospitality Awards, ‘e māsani ‘ona tufatufaina ai fa’ailoga ‘e āmana’ia ma āloa’ia ai pisinisi nei, ‘ua tu’u atu ‘i le tausaga ‘ā sau 2025, ‘ona ‘o le mau fītā ma le mau lu’itau, sā feagai ai ma sui ‘āuai ‘i lenei tausaga.
‘O pisinisi nei ‘e aofia ai fale’aiga ma fale kalapu ‘ua iloga ‘ona āfāina, ‘ona ‘o le tau lēai ‘o ni tagata fa’atau ma fa’aaogāina ia ‘au’aunaga ‘e māfua ‘i le to’atele ‘o tagata faigāluega ‘a le Mālō ‘ua vāea mai a lātou gāluega, ma le to’atele ‘o isi ‘ua faigāluega mai ‘i le fale, ‘ātoa ai ma le taugatā ‘o le soifuaga lautele.
‘E o’o mai ‘i le taimi nei, ‘e sili atu ‘i le 50 le aofa’iga ‘o fale’oloa ‘aemaise ‘o pisinisi ‘e iai fale’aiga ‘ua tāpuni ‘ua lē toe faia ‘i le vā ‘o Courtney Place ma Lambton Quay, ‘e aofia ai le Pandoro Bakery ma le Egmont Eatery
‘O le pisinisi aupito lata mai ‘ona fa’alētonu, ‘o le Bordeaux Bakery ‘i Thorndon Quay, lea na tapuni mō le taimi mulimuli ‘i le pō ‘o le Aso Sā na te’a nei.
Na fa’ailoa mai ‘e le Fa’atonu ‘o le Sōsaiete ‘a le ‘au fai Fale’aiga ‘i Uēligitone, ‘o Marisa Bidois, ‘o le tolopōina ‘o lenei fa’amoemoe, ‘o se tūlaga fa’anoanoa tele mō sui ‘āuai peita’i ‘e lagolagoina fo’i lea fuafuaga ‘e ā lātou sponsors ‘autū, ‘ina ‘ia tu’u atu ‘i le tausaga ‘ā sau, ‘e fa’ataunu’uina ai.
‘E le’i fa’amautūina ‘i le taimi nei se aso tonu ‘e faia ai, ‘ae na tā’ua ‘ātonu po’o le māsina ‘o ‘Aperila ‘i le 2025.
Link to RNZ (Article) translated by Lauano Ilaoa: https://www.rnz.co.nz/news/national/530717/wellington-s-hospitality-awards-postponed-due-to-tough-times
ATA: A series of long-standing Wellington businesses have closed this year, citing the tough business climate – including Pandoro bakery, which closed in September. Photo: RNZ / Kate Green