Toe tatala le ‘auala tele nūmera 6 ‘i Buller lea na poloka ‘e le solo ‘ele’ele

Sā gālulue le ‘aufaigāluega ‘i le tafi’esea ‘o le palapala mai le solo ‘ele’ele lea sā poloka ai se vāega ‘o le ‘auala tele nūmera 6 ‘i le itūmālō Buller, ‘ona ‘o tīmuga mamafa ma le kiona lea na māfua ai ‘ona tāpunia le tele ‘o ‘auala ‘i le motu ‘i saute ‘i le fa’ai’uga ‘o le vāiaso. Sā mafai ‘ona toe tatalaina ai se vāega ‘o le alatele ‘i le vā ‘o Murchison ma le alalaupapa le O’Sullivan’s Bridge, ‘i le afiafi ‘o le Aso Sā, mō femalāgā’iga.
Na fa’ailoa mai ai ‘e le pūlega ‘o ‘auala tetele, le Waka Kotahi, ‘e na’o le 30 le maualuga ‘o le saoasaoa ‘e tatau ‘ona o’o ai ta’avale ‘i lea vāega ‘o le alatele, mā ‘e mana’omia ‘ona fa’aeteete ai ‘aveta’avale ‘uma ‘e uia. ‘Ae ‘o lo’o fa’amoemoe ‘e si’i ‘i le 50 kilomita ‘i le itūlā le tapula’a ‘o le saoasaoa ‘o ta’avale ‘i le Aso Lua. Na tā’ua mai fo’i, ‘o le tele lava ‘o ‘auala ia na tāpunia ‘ona ‘o uiga loulouā ‘o le tau ‘i le Aso To’ona’i, ‘ua toe talai nei mō femalāgā’iga māsani.
Link to RNZ (article) translated by Lauano Ilaoa: https://www.rnz.co.nz/news/national/532060/weather-part-of-sh6-reopens-after-heavy-rain-snow-cause-slips
Ata: Waka Kotahi – Contractors clearing a slip from State Highway 6 near Murchison.