Toe tasi le aso ‘e fa’aalia ai manatu ma lagona ‘o tagata ‘i le Pili ‘e uiga ‘i le feagaiga ‘o Waitangi

‘E toe tasi le aso ‘o lo’o totoe mō le mamalu lautele ‘o le atunu’u, ‘e fa’aalia ai ni o lātou manatu ma lagona ‘i le komiti filifilia ‘o le Palemene ‘i Uēligitone, ‘e tusa ai ‘o le pili, po’o le Tūlāfono Taufa’a’ofi ‘a le Mālō, ‘e uiga ‘i le toe fa’atūlagaina ‘o le agaga ‘autū ‘o le Feagaiga ‘o Waitangi, le Treaty Principles Bill.
‘O lea pili, ‘e pei ‘ona silafia, ‘e matuā to’atele tagata na tete’e ‘i ai, ma māfua ai le solo tele po’o le hīkoi lea sā ‘āuai le faitau fia sefulu afe ‘o tagata āga’i atu ‘i le maota ‘o le palemene ‘i le tausaga na te’a nei.
‘E le’i manino mai ‘i le taimi nei, le aofa’iga ‘o tagata ma fa’alāpotopotoga ‘ua o’o atu ‘i luma ‘o le komiti filifilia ‘o lo’o iloiloina lenei pili, ‘ae na tā’ua ‘i līpoti ‘a le ‘au fa’asalalau ‘e mautinoa ‘e to’atele.
‘O le vaeluaga ‘o le pō ā nanei, ‘o le fa’amuta ai āloa’ia le taliaina ‘i luga ‘o feso’ota’iga televavave (online) ‘o manatu ma lagona tusitusia ‘e tusa ai ‘o lenei pili, ‘a’o le ītūlā ‘e 5 ‘i le afiafi ‘o le Aso Lulu ‘e fa’amuta ai ‘ona talia manatu tusituia ‘e lafoina atu ‘i le komiti ‘e ‘auala ‘i le meli māsani.
‘Ua folafola so’o ‘e le ali’i palemia ‘iā Christopher Luxon, ‘e lē lagolagoina ‘e lana pātī le faitauga ‘e liua ‘o lenei pili ‘i totonu ‘o le Palemene peita’i, ‘o le tūlaga lea ‘ua o’o ‘i ai, ‘ua matuā iloga ‘ona āfāina ai le vāfealoa’i ‘o le faigāmālō ma tagata Māori, ‘ona ‘o le pili lenei ‘a le pātī ‘a le ACT, le tasi ‘o vāega fa’a’upufai ‘o lo’o ‘i totonu ‘o le faigāmālō so’ofa’atasi.
Link to Associated Press (Article) translated by Lauano Ilaoa: https://www.rnz.co.nz/news/political/538312/final-day-for-public-feedback-on-treaty-principles-bill
The proposed bill, and the referendum it would trigger if passed into law, were at the heart of post-election negotiations. Ata: RNZ / Samuel Rillstone