Toe maua ‘e Niu Sila le matāti’a ‘o le Haka aupito ‘i to’atele tagata ‘e fa’atinoina ‘i le lalolagi

‘Ua toe maua ‘e Aotearoa le matāti’a ‘i le siva Māori ‘o le Haka ‘e aupito ‘i to’atele tagata ‘e fa’atinoina, ‘i le lalolagi ‘atoa.

‘O lea matāti’a, ‘e tusa ai ma fa’amaumauga ‘a le Guiness World Records, sā ‘umia talu ai nei ‘e le atunu’u ‘o Falani, lea na fa’atinoina ai ‘e tagata ‘e tusa ma le 4028 le aofa’i, ‘i le tausaga ‘e 2014.

Peita’i lā ‘o le pō ‘o le Aso Sā, na fa’atino ai ‘i le malae lakapī ‘o le Eden Park ‘i ‘Aukilani, le Haka ‘o le Ka Mate mā na fa’ailoa mai ‘e le sui ‘o le Guinness World Records, ‘o Brian Sobel, ‘e mautinoa lava ‘e o’o ‘i le 10,000 afe le aofa’i ‘o tagata sā ‘auai ‘anapō ‘i le fa’atinoina ‘o le Ka Mate.

‘E to’atele tagata sā malaga atu ‘i ‘Aukilani mai ‘itū ‘ese’ese ‘o Niu Sila mō lenei fa’amoemoe, mā ‘o nisi ‘o tagata iloga sā ‘auai ‘e aofia ai le ali’i lauiloa ‘i televise ‘i ‘Amerika ‘o Conan O’brien, fa’apea le ali’i fai ata tīfaga ‘o Taika Waititi ma le ali’i sā lauiloa ‘i faipelega ‘o To’oletai David Tua.

Na ‘amata talai faitoto’a ‘o le malae ‘i le Eden Park ‘i le ‘afa ‘o le 4.00 ‘i le afiafi ma fa’agāsolo ai fa’afiafiaga ‘a nisi ‘o ‘aufaipese lauiloa ‘a Niu Sila, ‘e aofia ai le Six60, Alien Weaponry, Che Fu ma le Topp Twins.

Link to RNZ (Article) translated by Lauano Ati Ilaoa: https://www.rnz.co.nz/news/national/529367/au-revoir-new-zealand-takes-back-haka-world-record

ATA: Smoke Photo and Video / Zahn Trotter / (RNZ).