To’atele ‘ua tala KiwiSaver ‘ona ‘o le taugatā ‘o le soifuaga

Līpotia mai le ‘umi ‘o le taimi ‘e fa’atali ai se tali mō tālosaga ‘a tagata ‘ua mānana’o ‘e tala a lātou teugātupe ‘o le KiwiSaver, ‘ona ‘o ni māfua’aga mā ni mana’oga fa’apitoa.

‘E māfua lea ‘ona ‘o le to’atele ‘o tagata fai saofaga ‘ua tālosaga mō se fesoasoani ‘i le taugatā ‘o le soifuaga ‘i lenei vāitaimi.

‘Ua fa’ailoa mai fo’i ‘e fa’apea, ‘o nai tausaga ‘ua mavae atu nei, sā mātauina ai le si’itia pea ‘o le aofa’iga ‘o tagata ‘e tala ‘i tua a lātou saofaga ‘ona ‘o mafatiaga ma fa’afītāuli tau tupe ‘e a’afia ai.

‘O le māsina ‘o Fepuari ‘o le tausaga nei, ‘e 4750 le aofa’iga ‘o tagata na tala ‘i tua a lātou KiwiSaver ‘ona ‘o mafatiaga sā a’afia ai, ‘e fa’atusa lea ‘i le aofa’iga ‘e 4130 sā talosaga mō se fesoasoani ‘iā Fepuari ‘o le 2025.

‘O le to’atele o lātou nei, sā fa’aalia mai le lē fiafia, ‘ona ‘o le ‘umi ‘o le taimi sā fa’atalitali ai.  ‘O nisi na o lātou fa’aalia ‘i luga ‘o feso’ota’iga televavave ‘e fa’apea sā talosaga mō se fesoasoani ‘i le māsina talu ai, ‘ae o’o mai ā ‘i le taimi nei ‘o lo’o fa’atali ‘e le’i maua mai se tali.

‘O se su’esu’ega sā faia ‘e le Uaeālesi Fa’asalalau ‘a Niu Sila ‘i le ‘umi ‘e fa’agāsolo ai se tālosaga mō se fesoasoani mai le KiwiSaver, na iloa ai, ‘o le kamupanī ‘o le ANZ, ‘e o’o ‘i le 20 aso faigāluega le ‘umi ‘e fa’agāioi ai se tālosaga mō le fia talaina ‘i tua ‘o se saofaga ‘ona ‘o ni mana’oga ogaoga ‘e a’afia ai se sui ‘o le KiwiSaver.

‘O le isi kamupanī tele ‘e fa’afoeina le KiwiSaver, ‘o le Fisher Funds, ‘e tusa ma le 30 aso le ‘umi ‘e fa’agāioi ai a lātou tālosaga ‘ona fa’ato’ā maua lea ‘o se tali.

Peita’i ‘e tele isi providers ‘e vave ‘ona fa’agāioi tālosaga ‘e fuafua lava ‘i le ‘āto’atoa ‘o mea ‘uma ‘e mana’omia ‘e fa’amaonia ma lagolagoina ai le fia vave talaina ‘i tua ‘o se saofaga.

Link to RNZ (Article) translated: https://www.rnz.co.nz/news/business/590967/money-how-long-are-kiwisaver-members-waiting-for-withdrawals

ATA: LDR / Alka Prasad (RNZ).