To’atele tagata ‘e malaga ‘ese ma Niu Sila

‘Ua fa’aalia ‘e se tasi ‘o kamupanī tele ‘e feagai ma le sā’ilia ‘o tagata faigāluega, ‘o le ‘ā fa’aauau pea ‘ona to’atele tagata ‘e malaga ‘ese atu ma Niu Sila, se’ia vaganā ‘ua pa’ū ‘i lalo le tului ‘o tupe ‘aitālafu mai faletupe.

‘O fa’amaumauga ‘a le ‘Ōfisa ‘o Fuāinūmera Fa’amaumauina ‘a le Mālō Niu Sila, ‘ua fa’alia ai ‘o le tausaga lea na ‘uma ‘i le māsina ‘o Mē, ‘e 82,800 le aofa’i ‘o tagata mai fafo na fa’aopoopo ‘i le faitau aofa’i ‘o tagata ‘o Niu Sila, ‘o se aofa’iga aupito pa’ū lea, talu mai le māsina ‘o Mati ‘i le tausaga na te’a nei, 2023.

Na fa’aalia ‘e le ali’i ‘ōfisa sīnia tau le tamāo’āiga ‘i le faletupe ‘o le Westpac, ‘o Michael Gordon, ‘o fuāinūmera nei ‘e māsani ‘ona fesuia’i, ‘ae ‘o le mea mautinoa lava, ‘e to’atele ‘o tagata ‘ua malaga ‘ese atu ma tu’ua Niu Sila, nai lō tagata ‘o lo’o fa’aopoopo mai ‘i tausaga taitasi.

Na tā’ua ‘e fa’apea ‘o le aofa’i ‘o tagata ‘ua tu’ua Niu Sila, ‘ua matuā sili mamao atu nai lō le tūlaga sā iai ‘a’o le’i o’o mai le fa’ama’i koviti-19.

E lata ‘i le 143,000 tagata mai fafo na ulufale mai ‘i Niu Sila ‘i le 12 māsina lea na ‘uma ‘iā Mē, ‘ae 60,100 le aofa’i ‘o ē na tu’uva’a ‘ese atu ai ma le atunu’u.

Na fa’aalia mai fo’i ‘e le ‘Ōfisa ‘o Fuāinūmera Fa’amaumauina,  ‘o se aofa’iga aupito maoa’e ‘e 85,600 tagata ‘o Niu Sila na malaga ‘ese ma le atunu’u ‘i le tausaga na mavae atu nei.

‘O se vāega tele ‘o nei tagata sā malaga atu ‘i atunu’u ‘e iai Saina, Peretānia, ma ‘Ausetālia.

‘A ‘o le toatele ‘o tagata mai fafo na ulufale mai ‘i totonu ‘o Niu Sila, ‘e mātele lava ‘i tagata mai atunu’u ‘e pei ‘o ‘Initia, Filipaina ma Saina.

ATA: Sāmoa Capital Radio (file).