To’asefulu le ‘au mānunu’a ‘ina ‘ua ta’avalevale se pasi ‘i le vā ‘o Rotorua ma Taupo

‘I le Motu ‘i Mātū  ‘e silia ‘i le to’a sefulu tagata na mānunu’a ‘ina ‘ua ta’avalevale se pasi na malaga ai ni tagata Tonga ‘e gālulue ‘i gāluega fa’avāitaimi ‘i le taeao ‘o le Aso Sā ananafi.  Na tupu lea fa’alavelave, ‘i le nu’u ‘e igoa ‘o Broadlands ‘i le vā ‘o Rotorua ma le ‘a’ai ‘oTaupō, pē tusa ‘o le 7.30 ‘i le taeao ‘o le Aso Sā.  Na fa’aalia mai ‘e leoleo ‘e fa’apea, ‘e lēai se isi ta’avale na a’afia ai ‘i lenei fa’alavelave, mā ‘o lātou ‘uma na mānunu’a ai, sā ‘auina ane ‘i le falema’i ‘i se va’alele helicopter, ‘e aofia ai tagata ‘e to’atolu ‘e i se tūlaga tīgāina. 

‘O se līpoti mai le Pule ‘o matā’upu tau Pasefika ‘i le ‘Ōfisa ‘o Femalāgā’iga ‘a Niu Sila, ‘o Mike Sorenson, na ia tā’ua ai, ‘e tusa ma le 30 le aofa’iga ‘o tagata faigāluega mai le Pasefika mō gāluega fa’avaitaimi, le RSE, sā malaga ai ‘i le pasi lea na tupu ai lenei fa’alavelave.  Na ia tā’ua ‘e fa’apea ‘o tagata faigāluega nei na fa’ato’ā taunu’u mai ‘i Niu Sila ‘i le taeao ‘o le Aso Sā, ma sā malaga atu ‘i le pasi āga’i ‘i le itūmālō ‘o le Hawkes Bay ‘i le kamupanī ‘a le Mr Apple, ‘e faigāluega ai.

Na tā’ua ‘e Sorenson, ‘e to’a 13 le aofa’iga ‘o tagata na ‘ave ‘i falema’i mō togafitiga, ‘ae ‘o le isi to’a 17 na fa’aauau le lātou malaga ‘i  Hawkesy Bay, ‘ina ‘ua ‘uma ‘ona tupu lenei fa’alevelave.  Na ia tā’ua fo’i ‘o le ‘ā fa’aauau pea ‘ona fesoasoani lā lātou matāgāluega ‘i tagata ‘uma na a’afia ‘i lenei fa’alavelave.

 Link to RNZ (article) translated by Savelina Kasiano:https://www.rnz.co.nz/news/national/532754/tongan-rse-workers-remain-in-hospital-after-rotorua-crash

Ata: RNZ / Patrice Allen