To’atasi ‘i le to’alima ‘o le ‘ā ātili fa’alētonu le tūlaga ‘o tāfaoga ‘i lenei tausaga

‘Ua fautuaina le atunu’u ‘ina ‘ia fa’atūlaga lelei se fuafuaga ‘o le fa’aaluga ‘o tupe mō aso mālōlō ‘e fesoasoani ‘e pūlea lelei ai le faigatā ‘o le si’itia ‘o le tau ‘o le soifuaga, ma tāofia ai fo’i le ono fai ‘o ni ‘aitālafu.  Na faia se sā’ili’iliga ma fesiligia ai le lata ‘i le 1100 ‘o tagata ‘e teu a lātou tupe ‘i le Westpac, ma ‘iloa ai ‘e 72 pasene na fa’aalia lo lātou matuā popole lava ‘i le tau ‘o le soifuaga, ‘ae lata ‘i le afa po’o le 45 pasene, ‘ua māe’a ona faia a lātou fuafuaga, ‘e fa’aitīitia ai a lātou tupe fa’aalu ‘i taimi ‘o faigāmālōlōga.

‘O le tele lava ‘o ‘āiga ‘ua faia a lātou fuafuaga ‘e pūlea lelei ai ‘a lātou tupe fa’aalu ‘i le taimi ‘o le taumāfanafana peita’i, ‘e 38 pasene ‘e lēai se fuafuaga ‘ua iai, ‘e tali atu ai ‘i le tau ‘o le soifuaga.  Na fa’aalia ‘e Warren Ngan Woo ‘o le Westpac, ‘o lea lava ‘e maua le taimi ‘e fa’atūlaga ai le pāketi ‘a le ‘āiga, ‘e fa’atupe ai vāega tāua ‘e pei ‘o meaā’oga ‘a tamaiti ma isi mea tāua mō le tausaga ‘ā sau.  Na’o le 27 pasene ‘o ‘i lātou na fesiligia, ‘ua māe’a ‘ona fa’atūlaga a lātou pāketi mō aso mālōlō, fa’atusatusa ‘i le 23 pasene ‘i le tausaga talu ai.  Na saunoa Ngan Woo, ‘e tāua le fa’a’āuai ‘o le ‘āiga ‘ātoa ‘i le tāpenaga ‘o le pāketi.

Link to RNZ (Article) translated by Savelina Kasiano: https://www.rnz.co.nz/news/business/536109/one-in-five-expect-holiday-strain-on-wallet-to-be-worse-this-year

ATA: Yiting Lin / RNZ