To’aono na māliliu ‘i luga ‘o ‘auala tetele ‘i Uēligitone ‘i le 2024, nūmera pito maualalo ‘i totonu ‘o le 34 tausaga

‘O se taimi pito sili lea ‘ona maualalo ai le fuainūmera ‘o tagata māliliu ‘i luga ‘o ‘auala tetele ‘i totonu ‘o Uēligitone, talu mai le 34 tausaga ‘ua tuana’i. ‘Ua fa’amauina ‘e fa’apea, ‘e to’aono na māliliu ‘i ta’avale lāvevea ‘i Uēligitone ‘i le 2024.
‘O le 2015 ma le 2010, na pito maualalo ai le nūmera na māliliu ‘i ‘auala ‘i le laumua, ‘e ta’i to’asefulu. ‘O Kāpiti, Wairarapa ma le taulaga ‘i Uēligitone, ‘e ta’ito’alua na māliliu ai ‘i le tausaga talu ai, ‘a’o Lower Hutt, Upper Hutt ma Porirua, ‘e lēai se soifua na maumau ai.
‘I totonu ‘o tausaga ‘e lima ‘ua tuana’i, sā pito sili ‘ona maualuga le fuainūmera ‘o ē na māliliu ‘i Uēligitone, ‘e to’a 20, ‘i le 2021.
Na fa’aalia ‘e Dylan Thomsen ‘o le AA, ‘e le’o iloa lelei le māfua’aga ‘ua pa’ū ai le nūmera ‘o ē māliliu ‘i luga ‘o ‘auala tetele ‘i le 2024 peita’i, ‘o le si’itia ‘o le māta’itū lelei ‘e leoleo ‘o ‘aveta’avale ‘ōnanā ma le saosaoa, ‘ātonu na fesoasoani tele ‘e fa’aitīitia ai lea fuainūmera.
‘Ua tau lē feoa’i fo’i tagata pe ‘ā lē lava le fa’asoa, ‘o le telegese ‘o le ola ‘o le tamāo’āiga ma le taugatā ‘o le soifuaga ‘ātonu ‘ua tau lē mānana’o ai tagata ‘e so’ona fa’aaogā a lātou ta’avale ‘ae fa’aalu tupe ‘i nisi mea aogā pei ‘ona fa’aalia ‘e Thomsen.
‘O ‘Aukilani ‘e to’a 36 na māliliu ‘i le tausaga talu ai ‘i ‘auala tetele ‘ae to’a 39 ‘i Canterbury.
Link to RNZ (Article) translated by Savelina Kasiano: https://www.rnz.co.nz/news/national/539625/six-road-deaths-in-wellington-region-in-2024-lowest-number-in-34-years
ATA: RNZ.