To’alua na māliliu ‘i se fa’alavelave ‘i le State Highway 1 ‘i mātū ‘o Mangaweka

‘E to’alua ni tagata ‘e aofia ai ma se tamaitiiti na māliliu ‘ona ‘o se fa’alavelave na lāvevea ai ni ta’avale se lua ‘i mātū ‘o Mangaweka ‘i le aso ananafi.  ‘E to’alua isi tagata mātutua ma se tamaitiiti ‘o lo’o togafitiga pea ‘i le falema’i, ‘ona ‘o se van ma se isi ta’avale na fetaui ‘i le aoauli.  ‘Ua si’itia ai le nūmera ‘o tagata māliliu ‘i luga ‘o auala tetele talu ‘ona ‘āmata fa’amamaluina aso mālōlō ‘o le Kerisimasi ma le Tausaga Fou, ‘i le to’aiva ‘e ui ‘e le’i fa’amaonia āloa’ia lea fuainūmera.

Sā līpotia muamua ‘e le Leitiō Niu Sila le tusa ma le to’a fitu ‘o tagata na māliliu ‘i luga ‘o ‘auala tetele talu mai le afiafi ‘o le Aso 24 Tēsema po’o le Christmas Eve.  Na fa’aalia ‘e Steve Greally ‘o le ‘Ōfisa ‘o Leoleo ‘i le Aso Sā, ‘o se tūlaga fa’anoanoa tele, le to’aiva ‘o tagata māliliu ‘i fa’alavelave tau ta’avale ‘e 8 ‘i luga ‘o auala tetele ‘ua maumau ai soifua, talu mai le Aso Lua.  ‘E lēai ma se ‘alofaga ‘o so’o se ‘aveta’avale ‘e lamatia ai soifua ‘o tagata ‘uma ‘ona ‘o le lē saogalēmū ‘o a lātou gāioiga ‘i luga ‘o ‘auala tetele pei ‘ona saunoa fa’atonu sili ‘o le va’aiga ‘o luga ‘o ‘auala tetele.

‘O le Aso 24 Tēsema na ‘āmata mai ai aso fa’amamaluina ‘o le Kerisimasi ma le Tausaga Fou ‘e o’o atu ‘i le aso 5 Ianuari.  ‘E to’aluasefululua tagata na māliliu ‘i luga ‘o ‘auala tetele ‘i aso mālōlō ‘o le Kerisimasi ‘i le tausaga talu ai.

Link to RNZ (Article) translated by Savelina Kasiano: https://www.rnz.co.nz/news/national/537789/two-dead-after-crash-on-state-highway-1-north-of-mangaweka

ATA: Police were alerted to the crash on State Highway 1 just before 1pm. Photo: Supplied