To’alima na mānunu’a tīgāina ‘i Waikato

‘E to’alima tagata na mānunu’a ‘i se fa’alavelave tau ta’avale i Waikato ‘i le State Highway 1 ‘i le taeao analeilā.  Na tā’ua ‘e leoleo, ‘e lua ni ta’avale na aofia ‘i se fa’alavelave ‘i Piarere pē tusa ‘o le ‘afa ‘o le lima ‘i le taeao analeilā.

‘E to’alima na mānunu’a tīgāina peita’i, ‘o le to’atolu lea na mau ‘i totonu ‘o ta’avale, na mafai ‘ona toe ave’esea.  ‘O le lua ai lea ‘o fa’alavelave ogaoga ‘i le vāega ‘o magāala ‘i ni nai māsina ‘ua tuana’i atu. 

‘O le māsina ‘o Nōvema, ‘e to’atasi na maliu ma le to’a 14 na mānunu’a ‘ina ‘ua fetaui se tama’i pasi sā isi ni tūrisi mai fafo, ma nisi ta’avale se lua.  ‘O lea fa’alavelave na tupu ‘i le itū ‘i mātū ‘o le ‘auala ‘e lata ‘i Horahora Road. 

 Link to RNZ (Article) translated by Savelina Kasiano: https://www.rnz.co.nz/news/national/538414/five-seriously-hurt-sh1-closes-in-waikato-after-crash

Ata: RNZ / Angus Dreaver