Tīgāina ‘i le falema’i se tama’ita’i NZ na susunu ‘e se tasi ‘i totonu ‘o lona fale ‘i Kingston ‘i Brisbane

‘O lo’o tīgāina ‘i se falema’i tele ‘i le setete ‘o Kuiniselani ‘i ‘Ausetālia, se tama’ita’i Niu Sila, ‘o lo’o masalomia na susunu ‘e se tagata ‘i totonu ‘o lona fale, ‘i le pitonu’u ‘e igoa ‘o Kingston ‘i saute ‘o le ‘a’ai ‘o Brisbane.

‘O le ali’i ‘o lo’o masalomia ‘i lenei fa’alavelave, ‘ua ‘uma ‘ona o’o ane ‘i le fa’amasinoga ‘i mōliaga ‘ua faia ‘i ai ‘e leoleo.  ‘O se līpoti ‘a le uaeālesi fa’asalalau ‘a Niu Sia, na tā’ua ai, ‘o le tama’ita’i ‘o lo’o a’afia ‘e igoa ‘iā Destiny Otton-Rakuraku, ‘e 34 tausaga, ‘o lo’o ‘i ai ‘i se tūlaga tīgāina ‘i le falema’i tele ‘o le Royal Brisbane Women’s Hospital.

‘O lenei tama’ita’i sā ola a’e ‘i ‘Aukilani ‘a’o le’i se’e atu ‘i ‘Ausetālia, mā ‘e fa’apea sā iai se fe’ese’esea’iga na a’afia ai ‘i le vā ma se ali’i ‘i totonu ‘o lona fale ‘i Kingston pē tusa ‘o le 26 kilomita ‘i saute ‘o le ‘a’ai ‘o Brisbane ‘i le taeao ‘o le Aso To’ona’i na te’a nei.

Na tā’ua ‘i se līpoti ‘a le 7 News ‘a ‘Ausetālia, ‘o le ali’i ‘e 36 tausaga le matua ‘e igoa ‘iā Renata Menning, lea ‘ua mōlia nei ‘e leoleo na ia asuina le penisini ‘i lenei tama’ita’i ma tutu ‘i ai le afi ma mū ai ‘o ia.

Sā molimauina lenei fa’alavelave ‘e tuā’oi ma lātou taumafai ai ‘e fesoasoani ‘i lenei tama’ita’i.
‘I le taimi nei ‘ua silia ‘i le $28,000 afe tālā ‘Ausetālia ‘ua fōa’i atu ‘e tagata ‘i se su’egātupe ‘ua faia ‘i luga ‘o feso’ota’iga televavave, ‘e fesoasoani ‘i ai ‘i lenei māfine ma lana fānau ‘a’o feagai ai ma lenei fa’alavelave mātuiā.

Link to RNZ (Article) translated by Lauano Ati Ilaoa: https://www.rnz.co.nz/news/national/539423/nz-woman-destiny-otton-rakuraku-fighting-for-life-after-she-was-allegedly-set-on-fire-in-queensland

Destiny Otton-Rakuraku, 34, remains in a serious condition in the Royal Brisbane and Women’s Hospital. ATA: Supplied to RNZ