Tete’e tagata fāigaluega ‘a le Woolworths ‘ona ‘o totogi

‘E lata ‘i le 10,000 tagata faigāluega ‘a supamāketi ‘a le Wooworths na pālota ‘e faia sa lātou  tete’e ‘ona ‘o le maualalalo ‘o o lātou totogi ma le lē saogalēmū ‘o le lē lava ‘o tagata faigāluega.

Na tā’ua ‘e le iuni ‘a tagata faigāluega ‘o supamāketi, le FIRST UNION, ‘e iva aso ‘o fa’agāsolo feutaga’iga ma le kamupanī, ma sā le’i taliaina ‘e le Woolworths le totogi ‘o tagata faigāluega ‘i le living wage po’o le totogi ‘e gafatia ‘ona tausia ai le ‘āiga ma ‘e le’i iai foi se fa’anaunauta’iga ‘o le kamupanī ‘e faia ai se fuafuaga ‘i fa’afītāuli ‘o le lē lava ‘o le ‘aufaigāluega.  Sā fa’aalia ‘e le iuni, ‘o se līpoti talu ai nei, na iloa ai, le maualalo ‘o totogi ‘a le Woolworths nai lō isi supamāketi ma fale’oloa tetele fou ia fa’ato’ā tatala ‘i Niu Sila ‘e aofia ai le Costco ma isi fale a le Foodstuffs ‘i le atunu’u, ‘o lo’o totogi a lātou tagata faigāluega ‘i le totogi ‘āmata fa’aletūlāfono.  ‘O le totogi ‘āmata ‘a le Woolworths ‘i le taimi nei ‘e $24.93 ‘i le ītūlā, ‘a’o le Costco ‘e $27 le totogi ‘āmata ‘o le tagata fou ‘i le itula ma le Foodstuffs ‘e pei ‘o le Pak n Save ‘i Kilbirnie, ‘e $26 ‘i le ītūlā le totogi ‘āmata.  ‘O le fa’amatalaga ‘a le Woolworths, ‘e ‘ese’ese penefiti ‘o lo’o ofoina atu ‘i le ‘aufaigāluega.  Ma ‘e silia ma le 45 miliona tālā ‘o lo’o ‘inivesi ‘e fa’aleleia ai a lātou fale’oloa ‘ina ‘ia saogalēmū mō le ‘aufaigāluega ‘e to’a 16,000 fa’apea ma tagata fa’atau.

Link to RNZ (Article) translated by Savelina Kasiano: https://www.rnz.co.nz/news/business/524273/woolworths-staff-vote-for-strike-action-over-low-wage-offers-unsafe-staffing-levels

ATA: Ziming Li / RNZ.