Tete’e le ‘au atamamai ‘i le si’itia ‘o le saoāsaoa ‘i luga ‘o ‘auala ‘o Niu Sila

‘O se fa’alāpotopotoga ‘ua tu’ufa’atasia iai le ‘au atamamai ‘i matātā ‘ese’ese, ‘e aofia ai fōma’i ma ‘i lātou ‘e fa’apitoa ‘i le saogalēmū ‘i luga ‘o ‘auala, ‘ua o lātou tāpenaina se tusi ‘ua tau’aao atu ‘i le Pālemia ma le Minisita ‘o ‘Auala ‘o Fela’uā’iga, ‘e fautuaina ai le toe silasila toto’a ‘i le fuafuaga ‘e si’itia le mauāluga ‘o le saoāsaoa ‘e ō ai ta’avale ‘i luga ‘o nisi ‘o ‘auala tetele.

‘O ‘i lā’ua na tūsia lea tusi, ‘o le ali’i ‘o Dave Cliff, le Fa’atonu ‘o le fa’alāpotopotoga ‘e tā’ua ‘o le Global Road Safety Partnership, ma le ali’i pōlofesa ‘o Simon Kingham ‘o le Iunivesite ‘o Canterbury, sā ‘avea muamua ma faufautua ‘autū mō le Matāgāluega ‘o Fela’uā’iga, le Ministry of Transport.

Na fa’aālia mai ‘e Kingham, ‘i le polokalame ‘o le Midday Report ‘a le Leitiō Niu Sila, ‘o lo’o naunau le Minisita ‘o Fela’uā’iga ‘iā Simeon Brown, ‘e si’itia le saoāsaoa fa’atapula’aina ‘o ta’avale ‘i luga ‘o ala tetele. ‘ae ‘o le to’atele ‘o le ‘au atamamai ma tagata su’esu’e ‘i matā’upu tau ‘i le saogalēmū, na ‘o lātou fa’aālia mai, ‘e lē ‘o se mea lelei lea fuafuaga ‘a le ali’i minisita.

‘O le popōlega tele ‘o i lātou nei, ‘o le ono to’atele ai ma fa’aopoopoina ai le āofa’i ‘o tagata ‘e māliliu ‘i fa’alavelave tau ta’avale ‘i le lumana’i.

Link to RNZ (Article) translated by Lauano Ati Ilaoa: https://www.rnz.co.nz/news/political/528126/experts-oppose-speed-limits-increase

ATA: RNZ / Angus Dreaver