Tele vāega ‘o Niu Sila na a’afia ‘i uiga loualouā ma le mālūlū ‘o le tau

‘O ia uiga loulouā ma le mālūlū ‘o le tau, sā a’afia ai se vāega tele ‘o Niu Sila ‘i le fa’ai’uga ‘o le vāiaso mā ‘o le mālolosi ‘o matagi na māfua ai ‘ona lē fa’ataunu’uina nisi ‘o malaga fa’atūlagaina ‘a va’āalalo ‘i le vāinu’u, ‘ae lē gata ‘i lea sā līpotia mai ai fo’i le pa’ū ‘o le kiona ‘i nisi vāega, ‘e ui ‘ina ‘o le ‘ōgātotonu lenei ‘o le taumāfanafana.

‘O nisi ‘o ata sā pu’eina ‘e nisi ‘iā lātou telefoni ma ‘ua fa’asalalauina ‘i luga ‘o ‘upega ‘o feso’ota’iga televavave, na iloa ai le pa’ū ‘o le kiona ‘i le ‘auala ‘o le Desert Road ‘i le ‘afa ‘o le 10 ‘i le taeao ‘o le Aso Sā ananafi, ‘o nisi ata na iloa ai fo’i le  pa’ū ‘o le kiona ‘i le ‘a’ai ‘o Napier, ‘o se tūlaga ‘e faigatā ‘ona talitonuina ‘i lenei taimi ‘o le tausaga.

Na fa’ailoa mai ‘e le ‘ōfisa ‘o le tau le MetService, ‘o se fesuiā’iga ‘i au ‘o le ‘ea ‘i le vāitaimi ‘o le Kerisimasi fa’asolo mai ai ‘i le Tausaga Fou, sā ‘aumaia ai tīmuga sa mana’omia ‘e nisi vāega ‘o le atunu’u, ‘aemaise vāega ‘i sasa’e ‘o le Motu ‘i Mātū sā ‘umi ‘o feagai ma mūgālā, peita’i, ‘o ia suiga ‘ua tele ‘ina lē mānaia ai tāfaoga ma mālōlōga ‘a le to’atele  na a’afia ai.

Link to RNZ (Article) translated by Lauano Ilaoa: https://www.1news.co.nz/2025/01/05/unusual-flurry-of-snow-falls-on-desert-road-during-height-of-summer/

ATA: Desert Road NZ